Şamaxını Asif Ağayev idarə etmir?

Rayonun icra hakimiyyətində vəzifə qalmaqalı yaranıb

Son günlər Şamaxıdan rayon rəhbərliyinin fəaliyyəti ilə bağlı şikayətlər artıb. Maraqlıdır ki, haqqının tapdalandığını deyən insanlar arasında elə icra hakimiyyətinin keçmiş işçilərinə də rast gəldik.

Şamaxı rayon sakini Elşən Cəfərov deyib ki, o, 2008-ci ildə İqtisad Universitetini bitirib: " Ali məktəbi bitirdikdən sonra, Çarhan kənd bələdiyyəsində və Şamaxı rayon mənzil istismar idarəsində işləmişəm. Sonra isə Şamaxı rayon icra hakimiyyətində sosial iqtisadi inkişafın təhlili və proqramlaşdırılması şöbəsində aparıcı məsləhətçi vəzifəsinə təyin edildim. Asif Ağayev rayona icra başçısı təyin olunduqdan sonra, məni özünə köməkçi götürdü. Bir ilə kimi başçının köməkçisi işlədim".
Elşən Cəfərovun dediyinə görə, əslində Asif Ağayev rayona real olaraq rəhbərlik etmir. Rayonu Tağı və Barat Həsənov qardaşları idarə edir: "Həsənov qardaşları əslən Şamaxıdandır. Barat Həsənov hazırda dövlət neft şirkətində təmir tikinti idarəsində işləyir. Hazırki icra başçısı Asif Ağayev də vaxtı ilə həmin idarədə Barat Həsənovla bir yerdə işləyib. Məni icra başçısı sifariş əsasında vəzifəmdən uzaqlaşdırdı. Dəqiqləşdirmişəm sifarişi Həsənov qardaşları verib. Başçı məni çağırıb dedi ki, səninlə daha işləmək istəmirəm. Təbii ki, mən çıxıb getdim. Bir aydan sonra başçı yenidən məni çağırıb bildirdi ki, səni başqa işlə təmin edəcəm. Ancaq elə fakt var idi ki, səni işdə saxlaya bilməzdim. Hansı faktın olduğunu o mənə demədi, mənim üçün də qaranlıq qaldı".
Elşən Cəfərov deyir ki, icra başçısı onu təhqir edib. 15 gün yaxınlarına təhdidlər olub: "Mən işdən çıxmaqla bağlı ərizə yazmamışdım. Buna görə də, başçı məni hər gün çağırıb təhqir edirdi. Məni məcbur edirdi ki, ərizə yazım. Həmin dönəmdə atam ürəyindən yenicə əməliyyat olunmuşdu. Başçı xəstə atamı da çağırıb təhdidlərə başladı. Mən gördüm ki, atama nə isə bir şey ola bilər, çarəsiz qalıb işdən azad olunmağımla bağlı ərizəmi yazdım. İcra hakimiyyətində işləyənlərin qulağı eşidə-eşidə başçı Asif Ağayev dəfələrlə ən ağır ifadələrlə məni təhqir edib. Sonradan öyrəndim ki, Tağı Həsənov neft şirkətində işləyən qardaşı Barat Həsənova deyib ki, Elşən Cəfərov işdən uzaqlaşdırılmalıdır. Başçı da bayaq dediyim kimi onların sözü ilə oturub durur. Ancaq belə götürəndə mənim Həsənov qardaşları ilə hər hansı problemim olmayıb. Bilmirəm bunu niyə etdilər?"
Elşən Cəfərov deyir ki, onun yerinə dayısını təyin ediblər: "Məni işdən çıxartdıqdan sonra, icra hakimiyyətində sektor müdiri işləyən dayımı yerimə təyin etdilər. Onu başçı çağırıb deyib ki, sən sektor müdiri işini icra edə bilmirsən, ona görə də iqtisadiyyat şöbəsində vakant olan yerə ərizə yaz. Dayım mənə müraciət elədi ki, razılıq verirsənmi o işə getməyimə? Təbii ki, mən ona dedim ki, bu dövlətin işidir, mənim şəxsi işim deyil ki, icazəni mən verim. Sonradan dayım ərizə yazıb bu işə keçdi. Mənim dayımla da heç bir problemim olmayıb. Sadəcə incidim, gərək o, bu işə prinsipə görə getməyəydi. Axı o görürdü ki, mənə qarşı haqsızlıq olub".
Şikayətçi Elşən Cəfərovun dayısı Elçin Cəfərov isə deyib: "Birincisi mən öz ərizəmlə sektor müdirliyi vəzifəsindən azad olunmuşam. Sonra baxıb gördüm ki, iqtisadiyyat şöbəsində vakant yer var, ora təyin olunmaq üçün icra başçısına ərizə yazdım. Başçı ərizəmi nəzərə alıb məni o vəzifəyə təyin etdi. Bu prosedur təxminən iki ay çəkib. Yəni öz ərizəmə əsasən, daxili əmrlə yerimi dəyişiblər. Mənim rayonda hamı ilə münasibətim normaldır. Tağı və Barat Həsənovlarla açıq deyim ki, çox yaxınıq, yoldaşlıq edirik. Bilirsiniz, bunun məsələyə heç bir dəxli yoxdur. Nə problem olubsa, bunun mənə heç bir dəxli yoxdur. Konfilikt olub- olmayıb mənə dəxli yoxdur. Bacım oğluna qarşı fikrim lap müsbətdir, ali təhsilli kadrdır. Deyə bilmərəm, rəhbərliklə onun arasında nələr baş verib, özləri bilərlər. Mən o işlərə qarışa bilmərəm".
Şamaxı rayon icra hakimiyyətində ictimai siyasi şöbənin baş məsləhətçisi Elnur Süleymanov isə ittihamları qəbul etmir: "Cənab başçı nə isə problem olmasa, kimisə vəzifəsindən kənarlaşdırmaz. Hazırda gəzib baxa, maraqlana bilərsiniz, rayonda abadlıq, quruculuq işləri aparılır. Problemi, digər zəruri ehtiyacı olan vətəndaşlara hər cür köməklik göstərilir. Sahibkarlara fəaliyyət üçün münbit şərait yaradılıb. Yaxınlarda rayonda sahibkarlığın daha da inkişaf etdirilməsi üçün davamlı investisiyaların axını başlayacaq. Rayonda bütün sahələrdə gənclərə üstünlük verilir, kimlərsə razı deyilsə,bu o demək deyil ki, bu belə deyil. Rayonun icra başçısı yerindədir, rayon layiqincə idarə olunur. Hesab edirəm ki, artıq fikirlərə ehtiyac yoxdur".
Bu məsələdə sifarişçi kimi adı hallanan, Şamaxı rayon Poçt İdarəsinin müdri Tağı Həsənov isə bildirib ki, qardaşı Barat Həsənov Dövlət Neft Şirkətində və onun məsələyə heç bir dəxli yoxdur: "İcra başçısı kiminsə tapşırığı ilə adam işdən çıxarıb, işə qoymur. Mən Elşən Cəfərovu tanımıram, ancaq atasını tanıyıram. Sizi tam əmin edirəm ki, Elşənin işdən çıxarılmasının nə mənə, nə də ki, qardaşıma aidiyyatı var. Mən kadrlar şöbəsinin müdiri deyiləm, axı mənim icra hakimiyyətinə nə aidiyyatım var? Kiməsə niyə mərdiməzarlıq etməliyəm? Axı belə cəfəngiyat şeylər nəyə lazımdır?"
Qeyd edək ki, Şamaxı rayonunun bundan əvvəlki rəhbərliyi ilə bağlı da çoxsaylı şikayətlər vardı. Nəticədə keçmiş icra başçısı Asif Məmmədov vəzifəsindən uzaqlaşdırıldı. Yeni icra başçısı ilə bağlı tənqidlərin nə qədər haqlı olub-olmadığını isə yəqin ki, Şamaxı sakinləri və aidiyyatı dövlət qurumları daha yaxşı bilir.
Günel Əkbər