Hafiz Məmmədov Azad Rəhimovu çətin vəziyyətdə qoydu
Hafiz Məmmədov Azad Rəhimovu çətin vəziyyətdə qoydu

"Lans" prezidenti "Hafka"dan əlini üzüb, Azərbaycandan yapışdı: "4 milyon verin"

Fransanın "Lans" futbol klubunun prezidenti Jerve Martel azərbaycanlı ortağı, klubun majoritar səhmdarı Hafiz Məmmədovdan pul almaq ümidlərinin boşa çıxmasından sonra Azərbaycan dövlətinin yaxasından yapışıb.
virtualaz.org xəbər verib ki, Jerve Martel klubun büdcəsinə 4 milyon avro köçürülməsi üçün Azərbaycan dövləti ilə birbaşa danışıqlar aparır. Məlumatı "Canal+" yayıb. Bildirilir ki, Fransanın Peşəkar Klublara Nəzarət Komissiyası "Lans"ın büdcəsində kifayət qədər pul olmadığını əsas gətirərək ona oyunçu transferini qadağan edib. Əgər sentyabrın 1-nə qədər zəruri vəsait tapılmasa "Lans"yni futbolçu transfer edə bilməyəcək.
Məlumata görə "Hafka" fransızlara "yaxın bir-iki həftədə pul tapacam" vədi versə də hazırda müflis durumda olan azərbaycanlı oliqarxın "Lans"a vəd etdiyi 10 milyon avronu verəcəyinə artıq inanmırlar.
Bu səbəbdən Jerve Martel böhrandan çıxmaq üçün Azərbaycan dövləti ilə birbaşa danışıqlara girməyi qərara alıb. Bəs "Hafka"nın verə bilmədiyi pula görə Azərbaycan dövləti niyə cavabdeh olmalıdır? Azərbaycan dövləti "Lans"a pul verməyə borcludurmu?
"Canal+" bildirir ki, Jerve Martelin Azərbaycan dövlətindən pul istəmək üçün əsas kimi "Lans"ın oyunçularının üzərində "Landof Fire Azərbaycan" şüarı yazılmış köynəklər geyməsini nəzərdə tutan müqaviləni göstərir. Bu müqavilə "Hafka" "Lans"ı alandan sonra bağlanıb və şərtə görə iki il ərzində klubun oyunçuları üzərində bu şüar yazılmış köynəklər geyməlidir.
İndi Jerve Martel hesab edir ki, "Lans" futbolçuları Azərbaycanı təbliğ etdiyinə görə Azərbaycan dövləti bu reklamın əvəzində kluba heç olmasa 4 milyon avro verə bilər. Azərbaycan tərəfinin bu istəyə reaksiyası məlum deyil.
Təxminlərə görə J.Martel 4 milyonla bağlı danışıqları Azərbaycanın Gənclər və İdman Nazirliyi ilə aparır. Azad Rəhimovun nazirliyinin bu çətin vəziyyətdən necə çıxacağı bəlli deyil. Bircə o məlumdur ki, "Hafka" Rəhimovu və onun nazirliyini olduqca ağır bir missiyanı yerinə yetirmək vəzifəsi ilə qarşı-qarşıya qoyub.
Onu da deyək ki, Hafiz Məmmədovun ciddi maliyyə böhranı ilə üzləşdiyi barədə xəbərlər mətbuatda bir müddətdir yazılır. Hətta iş adamının bu yaşananlardan sonra əvvəlcə həbs olunduğu, daha sonra isə ölkəni tərketdiyi barədə də məlumatlar ortaya çıxmışdı. Birqədər əvvəl "Hafka"nın Bakıdakı mülklərini İsatışa çıxardığına dair informasiyalarda yayılmışdı. Həmin vaxt KİV qeyd edirdi ki, üzləşdiyi pulsuzluq səbəbindən Hafiz Məmmədovun müvəqqəti çıxış yollarından biri kimi özünün dəyəri milyonlarla manat olan villalarını satışa çıxarması istisna deyil.
Günel Əkbər