Əbülfəs Qarayevin adı 1 milyon 830 min manatlıq qalmaqalda

Bir qrup mədəniyyət işçisindən Bakı Şəhər Mədəniyyət və Turizm İdarəsində baş verən özbaşınalıqla bağlı şok iddialar

"Artıq dəfələrlə Bakı Şəhər Mədəniyyət və Turizm İdarəsində baş verən özbaşınalıqlar barəsində şikayətlər dərc olunur. Amma çox təəssüf ki, nə Hacıbala Abutalıbov, nə də Əbülfəs Qarayev minlərlə mədəniyyət işçilərinin narazılıqlarına və haqlı şikayətlərinə reaksiya verir. Buna görə də neqativ hallar günü-gündən artmaqda və mədəniyyət işçilərini bu sahənin rəhbərlərindən narazı salmaqdadır". Bunu bir qrup mədəniyyət işçisi Əlikram Əliyevin rəisi olduğu Bakı Şəhər Mədəniyyət və Turizm İdarəsində baş verən özbaşınalıqlar və korrupsiya faktları ilə bağlı mətbuata şok müraciətlərində bildiriblər.

Müraciətdə xatırladılır ki, uzun müddətdir Əlikram Əliyev tender oyunları vasitəsilə dövlət büdcəsindən İdarəyə ayrılan küllü miqdarda vəsaitin qaranlıq taleyi ilə bağlı yazılar dərc olunur: "Belə ki, İdarənin 1 və 2 saylı Maliyyə və İqtisad Regional bölmələri uzun illərdir ki, direktorlara məcburi maliyyə sənədləri imzalatdırırlar. İmzalanan sənədlərdə dəyəri yüz min manatlarla olan inventar və avadanlıqların, xidmətlərin heç 1 faizini biz direktorlara vermirlər. Sadəcə olaraq, Ə.Əliyevin əlaltılarının sayəsində 1 insanın adına onlarla MMC yaradılır və onların əlilə küllü miqdarda vəsait tender adı altında mənimsənilir. Məsələn, təkcə 2015-ci ilin may ayınadək keçirilən tenderlərdə həmin bu yalançı MMC-lər vasitəsilə görülən işlərə və alınan mallara baxaq:
1. Kommunal və kommunikasiya işlərinin satın alınması - 34.341 manat (qalib - Tac-2014 MMC)
2. Kommunal və kommunikasiya işlərinin satın alınması - 120.511 manat (qalib - Tac-2014 MMC)
3. Cari təmir işlərinin satın alınması - 44.318 manat (qalib - Tac-2014 MMC)
4. Cari təmir işlərinin satın alınması - 236.627 manat (qalib - Tac-2014 MMC)
5. İdarənin digər xərcləri üzrə satınalmalar - 47.310 manat (qalib - SRS-Company MMC)
6. Mətbəə xərcləri üzrə satınalmalar - 19.294 manat (qalib - SRS-Company MMC)
7. Avadanlıqların satınalınması - 11.060 manat (qalib - SRS-Company MMC)
8. Sair xərclər üzrə satınalmalar - 9.324 manat (qalib - SRS-Company MMC)
9. Digər maşın və avadanlıqların satınalınması - 173.863 manat (qalib - SRS-Company MMC)
10. Dəftərxana və təsərrüfat mallarının satın alınması - 94.551 manat (qalib - SRS-Company MMC)
11. İdarənin digər xərcləri üzrə satınalmalar - 52.448 nanat (qalib - SRS-Company MMC)
12. Bərk inventarların satın alınması - 233.007 manat (qalib - SRS-Company MMC)
13. Yumşaq inventarların satın alınması - 78.001 manat (qalib - SRS-Company MMC)
14. Mətbəə xərcləri üzrə satınalmalar - 20.805 manat (qalib - SRS-Company MMC)
15. Digər alış və xidmətlərin satın alınması - 83.204 manat (qalib - SRS-Company MMC)
16. Sair xərclər üzrə satınalmalar - 103.627 manat (qalib - SRS-Company MMC)
17. Digər alış və xidmətlərin satın alınması - 298.658 manat (qalib - SRS-Company MMC)
18. Digər maşın və avadanlıqların satın alınması - 173.883 manat (qalib - SRS-Company MMC)
19. Dəftərxana və təsərrüfat mallarının satın alınması - 90.209 manat (qalib - SRS-Company MMC)
20. Yumşaq inventarların satın alınması - 74.335 manat (qalib - SRS-Company MMC)
21. İnventarların satın alınması - 159.034 manat (qalib - SRS-Company MMC)
22. Avadanlıqların satın alınması - 107.569 manat (qalib - SRS-Company MMC).
Bir məsələyə nəzər salsaq görərik ki, cari ildə Ə.Əliyevin mühasibləri əsasən 2 MMC ilə əməkdaşlıq ediblər. Bu MMC-lərdən biri Tac-2014 MMC 2014-cü ilin sentyabr ayının 8-də Cavid Adıgözəl oğlu Əliyevin adına dövlət qeydiyyatından keçib. Qanuna əsasən isə yaradılan MMC 5 il fəaliyyət göstərdikdən sonra tenderdə iştirak edə bilər. Amma qeyd olunan bu MMC cəmi 3-4 ay olar ki, yaradılmış və İdarənin elan etdiyi tenderlərdə iştirak edərək toplam 435 min 797 manat həcmində iş görmüşdür.
Bu tenderlərdə iştirak edən digər MMC isə SRS-Company MMC-dir. Bu MMC də 2014-cü ilin sentyabr ayının 12-də İlqar Mirzə oğlu Məmmədovun adına dövlət qeydiyyatından keçib. Bu MMC isə İdarənin elan etdiyi tenderlərdə iştirak edərək toplam 1 milyon 830 min 182 manat həcmində iş görmüşdür. Bu sadəcə 2015-ci ilin 3-4 ayı ərzində ayrılan vəsaitlərdir. Əlikram Əliyev isə 2008-ci ildən İdarənin rəisidir. Artıq sözə ehtiyac yoxdur.
Məsələnin ən təəccüblü tərəfi odur ki, milyon manatdan artıq bu maliyyə ayırmalarının böyük hissəsi eyni ad altındadır və bu da kifayət qədər əsas verir ki, burada yeyinti qaçılmazdır. Çünki bütün direktorlar və bütün mədəniyyət işçiləri bu səviyyədə xidmət və inventar, avadanlıqları görməmişik. Biz sadəcə 1 və 2 saylı Maliyyə və İqtisad Regional bölmələri tərəfindən tərtib edilən sənədlərə qol çəkmişik.
Artıq 1 aya yaxındır ki, Hesablama Palatası tərəfindən İdarədə yoxlamalar aparılır və ümid edirik ki, bütün bu qanunsuzluqlar aşkarlanacaq".
Müraciətdə bu il mayın 4-də Əlikram Əliyevin İdarənin tabeliyində olan mədəniyyət müəssisələri rəhbərləri ilə iclas keçirdiyi bildirilir: "İclasda Əlikram Əliyev biz direktorlara açıq-aşkar hədə qorxu gəldi və tapşırdı ki, bütün direktorlar yoxlama tərəfindən yazılacaq cərimələri ödəməlidir. Bu cərimələrin miqdarı isə 10 min manatadək dəyişir. Hətta 1 və 2 saylı Maliyyə və İqtisad Regional bölmələrinin rəhbərləri gecələr də direktorların evinə zəng edirlər.
Bəzi direktorlara isə tapşırılıb ki, onlar banklardan faizə pul götürsünlər və bunun üçün onlara banklara təqdim edilməsi üçün əmək haqqlarının yuxarı olmasını göstərən arayışlar verilir. Biz direktorlar ayda 120-150 manat maaş alan insanlarıq və heç birimiz Əlikram Əliyevin "şotunu" ödəmək fikrində deyilik. Əlikram Əliyev iclasda biz bildirdi ki, direktorların Hesablama Palatasına yazdıqları izahatlar ona təqdim olunacaq və kim rəislə arasında problem yaranmasını istəmirsə pul tapıb ödəməlidir. Biz almadığımız və görmədiyimiz inventar və avadanlıqların pulunu nəyə görə ödəməliyik? Bizi onunla qorxudur ki, biz o maliyyə sənədlərini imzalamışıq. Amma bilin ki, biz o sənədləri məcbur edilərək və işdən çıxarılmaq hədəsi altında imzalamışıq. Hesablama Palatasından xahiş edirik bu məsələlərə obyektiv və məntiqlə yanaşsın".
Müraciətdə həmçinin mədəniyyət və turizm naziri Əbülfəs Qarayevdən və Bakı şəhər İcra Hakimiyyətinin başçısı Hacıbala Abutalıbovdan da baş verənlərlə bağlı ölçü götürmələri xahiş edilir.
Orxan Həsənli