Bakıda uşaqların qəniminə çevrilən eyvanlar - FOTO

18:35 31-07-2016

CƏMİYYƏT

Son zamanlar azyaşlı uşaqların ölümü ilə nəticələnən bədbəxt hadisələrin sayı artıb. Səbəb kimi isə valideynlərin diqqətsizliyi və səhlənkarlığı göstərilir. Lakin başqa bir səbəb də bəzi köhnə binalarda, əsasən isə yeni tikililərdə eyvanların açıq olması və uşaqların orada nəzarətsiz qalmasıdır.

Mayın 12-də paytaxtın Nizami rayonunda 3 yaşlı İsa Vəliyevin, mayın 28-də 3 yaşlı Jalə İbrahimovanın, iyunun 28-də Binəqədi rayonunda 2 yaşlı İmran Quliyevin, iyulun 3-də 5 yaşlı Nadir Xəlilovun və iyulun 10-da Pirallahı rayonunda 2 yaşlı Arzu Abışzadənin yaşadıqları çoxmərtəbəli bunaların eyvan və pəncərələrindən yıxılaraq ölməsi uşaq ölümlərində bu səbəbin də gözardı edilməməsinin vacibliyini göstərir.

Unikal.org musavat.com-a istinadən bildirir ki, Daxili İşlər Nazirliyi və Baş Prokurorluq uşaq ölümləri ilə nəticələnən bədbəxt hadisələrlə bağlı valideynləri diqqətli olmağa çağırıb: "Ailələrin faciəsinə səbəb olan belə bədbəxt hadisələrin təkrarlanmaması üçün valideynlərə xüsusən azyaşlı övladlarına qarşı daha diqqətli və məsuliyyətli olmalarını tövsiyə edirik".

Sözügedən bədbəxt hadisələrin baş verməsinin əsas səbəblərindən biri də binaların eyvanlarının alçaq olması və heç bir qoruyucu dəmir barmaqlıqların olmamasıdır. Əsasən yeni tikililərdə belə təhlükəsizlik tədbirləri görülmür. Demək olar ki, bütün yeni tikilən binalarda eyvanlar açıq şəkildə tikilib təhvil verilir. Ola bilər ki, bu formada dizayn verilməsi binaların dəbdəbəli görünüşü üçün nəzərdə tutulub, lakin bu evlərdə yaşayacaq azyaşlıların təhlükəsizliyi nəzərə alınmayıb. Bəzi ailələr öz vəsaitləri hesabına eyvanlara şüşə aynabənd və ya dəmir barmaqlıq vurdursa da, əksəriyyət bu təhlükəsizlik qaydalarına əməl etmir.

Nizami rayonu, Qara Qarayev prospekti 84 ünvanında eyvanı açıq binalara rast gəldik. Burada yaşayan sakinlər də durumdan narazıdır. Binanın eyvanı təqribən 1 metr hündürlüyündədir. Nəinki azyaşlı uşaqlar üçün o cümlədən böyüklər üçün də təhlükəli hesab etmək olar.

Binanın komendantı Təbriz Aslanov bildirdi ki, bir müddət öncə bədbəxt hadisə baş verdiyindən sakinlər eyvanlarını bağlayırlar: "Qanunla qadağan olunsa da, əksər sakinlər bu addımı atırlar. Onlar eyvanlarını dəmir barmaqlıqlar və yaxud şüşə ilə bağlayırlar. Lakin bu işlər qaydalar çərçivəsində olmalıdır. Biz bina sakinlərinə dəmir barmaqlıqlardan istifadə etmələrini söyləyirik. Yəni eyvanın ətrafını tam bağlamaq olmaz. Çünki yanğın zamanı FHN əməkdaşları içəriyə daxil ola bilmir. Buna görə də, fövqəladə hallar və yaxud xilasetmə üçün dəmir barmaqlıqlara qapı qoyulmasını tələb edirik. Partlayış zamanı da pəncərələrin bağlı olması təhlükəni artırır. Gərək açıq olsun ki, insanlara və ya qonşu mənzillərə zərər vurmasın".

Binada olduğumuz zaman az sayda sakinlərin eyvanlarına qoruyucu barmaqlıqlar quraşdırdığının şahidi olduq. Bina sakinləri bu cür məsələlərə ciddi yanaşdıqlarını və həyatlarının təhlükə qarşısında olduğunu dedilər: "Ümumiyyətlə şirkətlər bina tikərkən yalnız onun rahatlığını deyil, təhlükəsizliyini də nəzərə almalıdır. Dizə qədər hündürlükdə eyvan olarmı? Uşaq əlini uzadanda rahat şəkildə dırmaşa bilir. Bunu tikintini aparan şirkətdən soruşmaq lazımdır. İmkanı olanlar dəmir barmaqlıqlar və ya pəncərə qoydurur. Bəs, imkanı olmayan neyləsin? Kənardan binaya baxsanız yamaq-yamaq görünür. Bunu standart bir qaydada eləmək olar. Bir zamanlar ümumiyyətlə icazə vermirdilər ki, qoruyucu nəsə qoyulsun. İndi də elə şərtlər qoyurlar ki, etmək olmur. Gözləyirlər kiminsə balası yıxılsın ölsün".

Sonda onu da qeyd edək ki, eyvanlara dəmir barmaqlıqların vurulması da tikinti qaydaları ilə tənzimlənir. Bu barmaqlıqlar elə vurulmalıdır ki, yanğın və digər fövqəladə hallar zamanı problem yaratmasın. Lakin bu norma heç də eyvanların tamamilə açıq qalması anlamına gəlməməlidir. Əks halda belə eyvanlar hələ çox azyaşlıların "qatil"inə çevrilə bilər.