Ermənistanda zabit tərəfindən döyülmüş xərçəng xəstəsi olan əsgər ölüb.

Unikal.org-un "Epress.am"a istinadən verdiyi məlumata görə, Vanadzor sakini Xaçik Barseqyan 2014-cü ilin sonlarında həqiqi hərbi xidmətdən qayıdıb və 2016-cı il martın 27-də ayağındakı bədxassəli şişdən vəfat edib.

Ölən gəncin anası Sonik Qazaryan oğlunun hərbi xidmətdə olduğu zaman ayağındakı ağrılardan şikayət etdiyini və axsadığını söyləyib: "Məndən oğlumu hərbi xidmətdən azad etmək üçün 4 000 ABŞ dolları tələb etdilər. Oğlum hərbi xidmətdən qayıtdıqdan sonra batalyon komandiri Viqen Mkrtçyan tərəfindən döyüldüyünü etiraf etdi. Mən də hərbi komissarlığa şikayət etdim. Lakin komandir bunu inkar etdi və dəlillərin olmadığını bildirdi".

S.Qazaryan deyib ki, oğlu xəstə yatağında yatarkən əsgər yoldaşları onu ziyarət edib və komandir tərəfindən döyüldüyünü təsdiqləyiblər.

Qeyd edək ki, 2015-ci ilin aprelində X.Barseqyanın vəziyyəti kəskin pisləşib, onu Moskvaya aparıblar və ona son mərhələ bədxassəli şiş diaqnozu qoyulub. X.Barseqyan Ermənistana qayıdıb, onun ayağı amputasiya olunub, lakin mart ayında vəfat edib.