Təxminən bir həftə öncə AFFA-nın inzibati binasında böyük qalmaqal yaşanıb.

Unikal.org "Ölkə.Az"-a istinadən xəbər verir ki, qurumun iki xanım əməkdaşının mübahisəsi sonda saçyolduya çevrilib. Qeyd olunur ki, dava edən tərəflərdən biri qurumda baş katib Elxan Məmmədovun yaxın dostu və adamı kimi tanınan Xanım adlı şəxsin bacısı olan Sevinc adlı qadındır.

Qeyd edilir ki, sözügedən bacılar məhz Elxan Məmmədovla dostluqlarının hesabına lüks mənzillərdə yaşayır, dünyanın ən bahalı istirahət mərkəzlərində dincəlirlər.

Hadisəyə gəlincə, bir həftə öncə səhər saatlarında Sevinc iş otağında yüksək səslə musiqi dinləyirmiş. Bu zaman işə yeni qəbul olunan bir xanım (adını dəqiqləşdirməyə çalışırıq-red.) bu barədə ona iradını bildirib. Yeni işçinin iradını təhqir kimi qəbul edən Sevinc qarşı tərəfə təhqiramiz cavablar verib. Mübahisə qarşıdurmaya, sonda isə saçyolduya çevrilib.

Qeyd edilir ki, Elxan Məmmədovun dostu olan Xanım adlı qadın da yeni işçiyə hücum edib.

Sevincin halı pisləşib və AFFA-nın inzibati binasına təcili tibbi yardım çağırılıb və o xəstəxanaya yerləşdirilib. Hazırda vəziyyətinin normal olduğu deyilir.

Maraqlısı odur ki, hadisə Elxan Məmmədovun iş otağıyla qonşuluqdakı otaqda baş verib və saçyoldu vaxtı baş katib də otaqdaymış. Davadan sonra Xanım yeni işçini işdən qovdurmaqla hədələyib:

"Elxançikə deyəcəm, səni buradan iti qovan kimi qovsun".

Mövzunu diqqətdə saxlayacağıq.