Xaçmaz rayonunda şagirdinə qarşı əxlaqsız hərəkətlər etməkdə təqsirli bilinən 62 yaşlı Gülfərz Alxasovun cinayət işi üzrə məhkəmə prosesi başlayıb.

Unikal.org Publika.az-a istinadən xəbər verir ki, Gülfərz Alxasov Xaçmaz rayonunun Arzu qəsəbə tam orta məktəbinin direktoru vəzifəsində işləyib. Gülfərz Alxasov 1996-cı ildən həmin məktəbdə direktor kimi fəaliyyət göstərib.

O, orta məktəbin 6-cı sinif şagirdi, 2006-cı il təvəllüdlü Sayalı Məmmədovaya (ad və soyad şərti verilib - H.Z.) qarşı əxlaqsız hərəkətlər edib.

Direktorun otağında əxlaqsız hərəkət

İttihama görə, Gülfərz Alxasov Xaçmaz rayonunun Arzu qəsəbə tam orta məktəbinin direktoru vəzifəsində işləyərkən öz cinsi ehtirasını təmin etmək məqsədi ilə azyaşlı şagirdi Sayalı Məmmədovaya seksual xarakterli hərəkətlər etmək qərarına gəlib.

Bu məqsədlə o, 20 sentyabr 2017-ci il tarixdə Sayalı Məmmədovanı xidməti otağına çağırıb. O, azyaşlı qıza qarşı seksual xarakterli hərəkətlər edib.

Şantaj və əxlaqsızlıq

Daha sonra Gülfərz Alxasov bu hərəkətlərinin heç kimə deməməsi barədə şagirdinə hədə-qorxu gəlib. Sonra o, növbəti günlərdə Sayalı Məmmədovanı xidməti otağına çağıraraq, ona qarşı iyrənc əməllərini davam etdirib.

Gülfərz Alxasovun bu hərəkətləri həmin ilin oktyabrın 30-dək davam edib. O, hər dəfə azyaşlı qızı xidməti otağına çağıraraq, onunla seksual xarakterli hərəkətlər edib.

İddia olunur ki, Gülfərz Alxasov 6-cı sinifdə oxuyan qızı hərə dəfə otağına çağıranda, onun dodağından öpüb, sonra digər hərəkətlər edib.

Direktorun sonuncu görüşü

Sonuncu dəfə oktyabrın 30-da Gülfərz Alxaasov xidməti otağına çağırdığı şagirdi ilə intima münasibətdə olmağa başlayıb. O, Sayalı Məmmədovanı kreslosunda oturduğu vaxt qucağına alıb və öpməyə başlayan zaman məktəbin işçilərindən biri içəri daxil olub.

Bundan sonra Gülfərz Alxasovun hərəkətlərinin üstü açılıb. Onun bu hərəkətləri qəsəbədə yayılıb və olaydan xəbərdar olan qızın valideynləri polisə şikayət ediblər.

Şagirdinə təcavüz edən direktorun həbsi

Şikayət əsasında Gülfərz Alxasov həbs edilib. İstintaq orqanı tərəfindən ona qarşı Cinayət Məcəlləsinin 153.3-cü (yetkinlik yaşına çatmayanı tərbiyə etmək vəzifəsi daşıyan şəxslər və ya yetkinlik yaşına çatmayana nəzarəti həyata keçirmək vəzifəsini daşıyan təhsil, tərbiyə, tibbi və ya digər müəssisənin müəllimi və ya digər işçisi tərəfindən əxlaqsız hərəkətlər etmək) maddəsi ilə ittiham elan edilib.

Gülfərz Alxasovun barəsində toplanan cinayət işinin materialları baxılması üçün Xaçmaz rayon Məhkəməsinə göndərilib. İş hakim Fizuli Mirzəquliyevin icraatına verilib.

"Cinayət sübuta yetirilməyib

Prosesdə təqsirləndirilən şəxsin vəkili Ayxan Rüstəmzadə vəsatətlə çıxış edib. O bildirib ki, hüquqlarını müdafiə etdiyi Gülfərz Alxasovun təqsiri sübuta yetirilmədiyi halda, yalnız zərərçəkmiş şəxs qismində tanınmış 14 yaşı tamam olmamış məhdud fəaliyyət qabiliyyətli qızın, məktəbin bir əməkdaşının kütləvi informasiya vasitələrinə verdiyi sözlər məcmuəsindən ibarət həqiqəti ehtiva etməyən məlumat əsasında Cinayət Məcəlləsınin 153.3-cü maddəsi ilə təqsirləndirilməsinə dair cinayət işi Xaçmaz rayon polis şöbəsınin istintaq bölməsinin müstəntiqi Sail Tağıyev tərəfindən yekunlaşdırılaraq məhkəməyə təqdim edilib.

"Bu hakim vəsatətə baxıb

Vəkil qeyd edib ki, hazırda Gülfərz Alxasovun təqsirləndirilməsınə dair cinayət işi hakim Fizuli Mirzəquliyevin icraatındadır: "Cinayət işinin hakim Fizuli Mirzəquliyevin icraatında olması işin qeyri-obyektiv araşdırılmasına, sübutlara düzgün hüquqı qiymət verilməməsinə zəmin yaradacaq. Hakim Fizuli Mirzəquliyev iş üzrə əvvəllər hüquqlarını müdafıə etdiyi Gülfərz Alxasov barədə həbs qətimkan tədbirinin seçilməsinə dair vəsatətə baxıb.

"Obyektiv olmadığını bəyan etdi

Müdafiəçinin fikrincə, hakim Fizuli Mirzəqııliyevin bu cinayət işində obyektiv qərar qəbul etməyəcəyi hələ təqsirləndirilən şəxs barəsində həbs qətimkan tədbiri seçən zaman açıq-aydın görünüb: "Çünki, hakim Gülfərz Alxasovun təqsirləndirildiyi iş üzrə heç bir mötəbər sübut olmamasına baxmayaraq, sadəcə olaraq zərərçəkmiş şəxs qismində tanınmış 14 yaşı olmamış məhdud fəaliyyət qabiliyyətli qızın və məktəbin bir əməkdaşının Kütləvi İnformasiya Vasitələrinə verdiyi sözlər məcmuəsindən ibarət məlumat əsasında 62 yaşlı, ali təhsilli, ziyalı, daimi yaşayış yeri olan şəxs barəsində həbs qətimkan tədbiri seçib. Hakim bu qərarı ilə işin obyektiv araşdırılmasında maraqlı olmadığını bəyan edib. Bu hal birbaşa olaraq hakimin yenidən Gülfərz Alxasovun təqsirləndirilməsinə dair cinayət işinə məhkəmədə baxaraq araşdırma aparmasını məhdudlaşdırır.

Vəkil qeyd edib ki, hakim Fizuli Mirzəquliyevin iş üzrə qeyri-obyektiv olacağına şübhə yaradacaq əsaslar var: "Eləcə də təyin edilmiş məhkəmə prosesləri zamanı iş üzrə zəruri əhəmiyyət kəsb edən vəsatətlər verməsinə baxmayaraq hakim nəyəsə görə vəsatətləri, eləcə də 20 fevral 2018-ci il tarixinə təyin edilmiş prosesdə təqsirləndirilən şəxs barəsində ev dustaqlığının seçilməsi barədə əsaslı vəsatətimizi təmin etməyib.

İşə hansı məhkəmə obyektiv baxacaq?

Vəkil etirazda əlavə olaraq göstərib ki, Xaçmaz rayon Məhkəməsinin bütün məhkəmə tərkibinin sözügedən cinayət işində obyektiv olmayacaqlarını, hüquq-mühafızə orqanlarının məhkəməyə təsirini və bunun da hüquqlarını müdafiə etdiyi Gülfərz Alxasov barəsində qeyri-obyektiv araşdırma aparılaraq qanunsuz qərarın qəbul edilməsinə səbəb olacaq. O, Xaçmaz rayon Məhkəməsinin bütün məhkəmə tərkibinə etiraz verib və cinayət işinin materiallarının bu məhkəmədən alınaraq başqa bir məhkəməyə verilməsinə əsas yaratdığını qeyd edib.

Etiraz rədd edildi, hakimlər haqlı çıxdı

Prosesə sədrlik edən hakim vəkilin etirazı ilə bağlı iş üzrə məhkəmənin gedişinin yarımçıq saxlayıb və onun barəsində verilmiş etiraza baxılması üçün iş materiallarını Sumqayıt Apelyasiya Məhkəməsinə göndərib.

Apelyasiya instansiyasında etiraza hakim Hüseyn Nəbiyevin sədrliyi ilə baxılıb. Hakim vəkil tərəfindən verilən etirazı əsassız hesab edib və işin yenidən baxılması üçün Xaçmaz rayon Məhkəməsinə qaytarılması barədə qərar çıxarıb.

Yaxın günlərdə bu cinayət işi üzrə məhkəmə prosesi davam etdiriləcək.