Ekologiya və Təbii Sərvətlər Nazirliyi tərəfindən qoyulan tələblərdən narazı olan bir qrup karxana istismarçısı və sahibkarı oktyabrın 4-də Nazirliyə müraciət edib.

Unikal.org xəbər verir ki, onları ekologiya və təbii sərvətlər nazirinin müavini və digər məsul şəxslər qəbul edib.

Qəbul zamanı mübahisəli məsələlərə aydınlıq gətirilib, karxana istifadəçilərinin nəzərinə çatdırılıb ki, istismar zamanı ekoloji normalara, tullantıların düzgün idarə olunmasına, ətraf ərazilərdə yaşayan sakinlərə və ətraf mühitə ziyan vurmadan müasir avadanlıqlardan istifadə edərək fəaliyyətlərini qursunlar.

Bir daha onlara bildirilib ki, müvafiq icra hakimiyyətindən torpaq ayırmaya dair sərəncam almalı, ekoloji və geoloji sənədlərini qaydaya salmalıdırlar.

Qeyd edək ki, əksər karxana istifadəçiləri müvafiq icra hakimiyyətinin torpaq ayırmaya dair sərəncamı olmadan və ekoloji norma və qaydalara riayət etmədən fəaliyyət göstərir.