Azərbaycan Dillər Universitetində (ADU) Xocalı soyqırımının 27-ci ildönümü münasibəti ilə keçirilən silsilə tədbirlər davam edir. Universitetin Tələbə Elmi  Cəmiyyətinin (TEC) təşkilatçılığı ilə  baş tutan “Xocalı faciəsi –XX əsrin faciəsi” adlı tədbir də bu qəbildəndir.

Unikal.org xəbər  verir ki, dəyirmi masada çıxış edən TEC-in sədri Lamiə Muğalova qeyd edib  ki, qanlı olaydan 27 il ötməsinə baxmayaraq, indi də bu haqda danışmaq sarsıdıcı və ağrılı məsələdir.  L.Muğalova  ermənilər tərəfindən törədilən hadisəni misli görünməmiş dəhşətli faciə kimi xarakterizə edib. O, bildirib ki, Xocalı faciəsi zamanı əliyalın, dinc əhaliyə divan tutulub və bu terror aktı xalqımızın qan yaddaşına həkk olunub.

ADU-nun Tərbiyə işləri üzrə prorektoru vəzifəsini icra edən Sərraf Hüseynov universitetdə Xocalı soyqırımı ilə bağlı keçirilən silsilə tədbirlərin əsas məqsədinin gənc nəsildə faciə ilə bağlı dolğun təsəvvür yaratmaq, qanlı olayın reallıqları haqqında onlara məlumat vermək olduğunu bildirib.

Daha sonra universitet tələbələri və dəyirmi masada iştirak edən qonaqlar Xocalı soyqırımı ilə bağlı müxtəlif mövzularla çıxış ediblər.

Digər  bir tədbir isə universitetin Filologiya və jurnalistika fakültəsinin təşkilatçılığı ilə keçirilib.  “Xocalı soyqırımını unutma!” adlı dəyirmi masada açılış nitqi ilə çıxış edən Filologiya və jurnalistika fakültəsinin dekanı vəzifəsini müvəqqəti icra edən fil.f.d. Aygün Yusifova  Azərbaycan xalqının hər il fevral ayının 26-nı Xocalı soyqırımı qurbanlarının xatirəsini yad etdiyini bildirib. O, əlavə edib ki, faciənin törədildiyi gün dinc əhalinin məruz qaldığı zorakılıq və vəhşilik, Xocalıda baş verən qətliam hər bir Azərbaycan vətəndaşının qəlbində qalır və bu, hec vaxt unudulmayacaq. A.Yusifova soyqırımı nəticəsində  həyatını itirmiş soydaşlarımızla bağlı statistik məlumat verərək vurğulayıb ki, erməni quldurları qadın, uşaq, yaşlı demədən xalqımıza qarşı kütləvi qətllər törədiblər.

Digər çıxışçılar Xocalı soyqırımı haqqında  tarixi faktlara əsaslanan məlumatlar veriblər, faciənin bəşəriyyətin üzləşdiyi ən qanlı soyqırımlardan olduğunu bildiriblər və soyqırımının qiymətləndirilməsi prosesindəki tarixi ədalətsizlikdən söz açıblar.