Yanvarın 30-da Kürdəmir Rayon İcra Hakimiyyətinin Başçısı Ceyhun Cəfərovun  rayonun Qarabucaq qəsəbəsində əhali ilə növbəti səyyar görüş-qəbulu keçirilib.

Qəbulda rayonun Qarabucaq qəsəbə inzibati ərazi dairəsinə daxil olan Qarabucaq qəsəbə, Qarabucaq və Qurd Bayram kəndlərinin sakinləri, həmçinin rayonun hüquq mühafizə orqanlarının, idarə, müəssisə və təşkilatlarının rəhbərləri iştirak ediblər.

Unikal.org xəbər verir ki, qəbulu giriş nitqi ilə açan Kürdəmir Rayon İcra Hakimiyyətinin Başçısı Ceyhun Cəfərov görüş iştirakçılarını salamlayaq bildirdi ki, möhtərəm Prezidentimiz İlham Əliyevin tapşırığına əsasən rayon icra hakimiyyətinin başçıları yerlərdə qəbullar keçirirlər. Cənab Prezidentimizin vətəndaşların müraciətlərinə həssaslıqla yanaşılması, onların problemlərinin həll edilməsi istiqamətində verdiyi tapşırıqların icrasına nail olmaq məqsədi ilə ərazilərdə təşkil olunan görüş-qəbullar əhali tərəfindən böyük rəğbətlə qarşılanır. Ceyhun Cəfərov yola saldığımız 2019-cu ilin rayonumuz üçün uğurlu keçdiyini, ötən ildə rayonumuzda müasir standartlara cavab verən Asan Xidmət Kompleksinin, Kürdəmir Xalça emalı müəssisəsinin, rayonumuzda məskunlaşmış məcburi köçkünlər üçün 563 mənzilli bütün sosial obyektləri olan şəhərciyin tikintisinın başa çatdırıldığını bildirdi. Ceyhun Cəfərov vurğuladı ki, Azərbaycan Respublikasının Prezidenti cənab İlham Əliyevin kənd yollarının yenidən qurulması ilə əlaqədar qarşıya  qoyduğu  vəzifələr Kürdəmir  rayonunda  da  uğurla  icra olunur.Belə ki, Kürdəmir rayonunda yerli əhəmiyyətli Şilyan-Qarasu, Pirili-Muradxan-Sor-Sor, Karrar–Bağman–Böyük Kəngərli  kəndlərinin avtomobil yollarının tikintisi başa çatdırılıb, Yenikən-Dəyirmanlı avtomobil yolunun tikintisi davam etdirilir və Ərəbqubalı-Çöl-Qubalı-Məhərrəmli kəndlərini birləşdirən, uzunluğu 18 km olan yerli əhəmiyyətli avtomobil yolunun tikintisinə başlanılıb. Hazırda rayonda Heydər Əliyev Fondunun təşəbbüsü ilə qəzalı vəziyyətdə və istismara yararsız olan şəhər 7 saylı uşaq bağçası-körpələr evi sökülərək yerində 40 yerlik uşaq bağçası-körpələr evi , rayonun Yenikənd kəndində  isə  istismara  yararsız  tibb məntəqəsi  sökülərək  yenidən  inşa edilir. ”BP” şirkətinin xətti ilə şəhər 6 saylı uşaq bağçası-körpələr evi əsaslı təmir olunur. Son illərdə rayon ərazisində 8 modul tipli məktəb binası quraşdırılıb, bundan əlavə Kürdəmir rayonunun E.Qurbanov adına Qarasu kənd tam orta məktəbi üçün 624 şagird yerlik yeni bina, şəhər 1 saylı tam orta məktəbinin binasında əsaslı təmir işləri aparılır. 

Səyyar  qəbulda  sakinlərin  suvarma  su  təchizatı, sosial müdafiə, kənd  təsərrüfatı,  torpaq  məsələləri , əlavə  örüş  sahəsinin  ayrılması,  məşğulluq  məsələləri  ilə  əlaqədar  təklifləri  və  şikayətləri diqqətə çatdırılıb, onların hər biri barədə aidiyyəti  təşkilatların  rəhbərinə tapşırıqlar verilib, qaldırılmış  məsələlərin  çoxu elə qəbul zamanı öz həllini tapıb.

Sonda sakinlər göstərilən diqqət və qayğıya görə dövlətimizin başçısına minnətdarlıqlarını bildiriblər.