Unikal.org “Günay Sığorta” şirkətinin Biznesin İnkişafı departamentinin rəhbəri Səidə Fətullazadə ilə müsahibəni təqdim edir?

- “Günay Sığorta” şirkətini qarşıda nə planlar gözləyir?

-Azərbaycanın ilk özəl sığorta şirkəti olan “Günay Sığorta” olaraq 3 illik (2021-2023 –cü illər) strateji hədəflərə çatmaq üçün biznes planlar və 2021-ci ilin büdcəsi üzərində çalışırıq.

Strategiya komitəsi və komandamız tərəfindən strateji planda  prioritet istiqamət olaraq HR, İT, CRM, Risklər, rentabellik və institusionallaşma kimi sahələr müəyyən edilib.

-Şirkətin yeni hədəflərində hansı növ sığorta məhsullarına üstünlük veriləcək? 

-Ümumi bazarın tendensiyasına uyğun olaraq, şirkətdə icbari növlər üstünlük təşkil edir. Yeni hazırlanan strategiyada könüllü növlərin portfeldə payının artırılması əsas prioritet məsələdir.

Bunun üçün yeni könüllü sığorta məhsullarının müştərilərə təqdim edilməyi gözlənilir. Son illər ərzində “Günay Sığorta” fəaliyyət istiqamətini daha da genişləndirərək regionlarda nümayəndəliklərinin sayını 10-a, satış nöqtələrinin sayını 100-ə çatdırmışdır. Yeni strategiyamızda Bakı şəhərində də nümayəndəliklərimizin müştərilərimizin xidmətinə verilməyi planlaşdırılır. 

-Kadr dəyişiklikləri haqqında nə deyə bilərsiniz?

-Hal hazırda yeni strateji hədəflərə uyğun olaraq yeni struktur yaradılıb. Yeni struktura yeni komitələr əlavə olunub və İdarə heyətinin sayı 3 nəfərdən 5 nəfərə qaldırılıb. Yeni biznes strategiyasında sığorta mütəxəssislərinin seçim və təlim proseslərinə yatırımlar ediləcək. Şirkətin satış fəaliyyətinin artırılmasından əlavə zərərlərin tənzimlənməsi istiqamətində müştərilərə yüksək xidmət göstərilməsi üçün yeni peşəkar kadrlar cəlb olunub və yeni prosedurlar hazırlanır. 

-Hal hazırda şirkətdə İdarə Heyətinin sədri vəzifəsini kim icra edir?

-Şirkətin İdarə Heyətinin sədri vəzifəsini hal hazırda şirkətin Direktorlar şurasının sədrinin müşaviri Sabir Quliyev icra edir. Sabir Quliyev uzun müddət Maliyyə Nazirliyində və Daxili İşlər Nazirliyində rəhbər vəzifələrdə çalışmışdır. 

-Şirkətin indiki və gələcək fəaliyyət dövrünü necə qiymətləndirirsiniz?

-Günay Sığorta artıq 28 ildir ki, fəaliyyətdədir və sığorta bazarı bunu göstərir ki, daha çox yığıma malik olmaqdan çox daha effektiv sığorta portfelinə sahib olmaq üçün düzgün strategiya hazırlamaq və düzgün idarəetmə siyasəti yürütmək lazımdır. 2019-cu ilin ilk 8 ayı ilə 2020-ci ilin müqayisəsinə baxsaq şirkətin yığımlarında 1,5 milyona yaxın artım olmasının şahidi olarıq.

Şirkət yeni və fərqli sığorta məhsulları, faydalı sosial layihələri ilə seçilir. 3 illik Strateji Plan təsdiq edildikdən sonra şirkətin gələcək fəaliyyət dövrü haqqında da məmnuniyyətlə məlumat bildirməyə hazıram.