Jurnalist Ronald Braunşteyn Respublikaçılar və Demokratlar arasında artan fikir ayrılıqları səbəbindən ABŞ daxilində birliyə təzyiqin artdığını yazıb.

"Unikal" xəbər verir ki, jurnalist "The Atlantic" üçün yazdığı məqalədə siyasi strateq və Analitik İnstitut layihəsinin sədri Maykl Podhorzerə istinad edib.

“Birləşmiş Ştatlar haqqında düşünəndə, onu qırmızı və mavi insanların mərmər qarışığı olan vahid bir millət kimi düşünməklə əsas səhvə yol veririk. Ancaq əslində biz heç vaxt tək millət olmamışıq".

Onun fikrincə, ABŞ iki millətdən - “mavi” (demokratlar) və “qırmızı” (respublikaçılar) ibarət federativ respublika kimidir.

Braunşteyn hesab edir ki, iki partiyanın artan bölünməsi mavi və qırmızı dövlətlər arasında "böyük fikir ayrılığına" təkan verir.

“Qırmızı və mavi millətlər arasında artan fikir ayrılığı və antaqonizm 21-ci əsr Amerikasının xarakterik xüsusiyyətidir. Bu, əsas tendensiyanın ümumi yaxınlaşma olduğu 20-ci əsrin ortaları ilə müqayisədə əhəmiyyətli dəyişiklikdir”, - deyə jurnalist əlavə edib.

Eyni zamanda o qeyd edib ki, amerikalılar 1850-ci illərdən sonra olduğu kimi bir daha bir-biri ilə vuruşmayacaqlar, lakin indiki parçalanma ölkənin sabitliyinə ciddi təhlükələr yarada bilər.

Bir müddət əvvəl ABŞ-ın keçmiş prezidenti Donald Tramp ABŞ-ın tənəzzülə uğradığını və bütün dünyanın gülüş obyektinə çevrildiyini bildirmişdi.

Ramil Zeynallı