Gürcüstanın Konstitusiya Məhkəməsi (KM) prezident Salome Zurabişvilinin impiçmenti məsələsi ilə bağlı ikinci iclas keçirib və üçüncü dinləməni oktyabrın 5-nə təyin edib.
"Unikal" xəbər verir ki, məhkəmə iclası yerli televiziya kanalları ilə canlı yayımlanıb.
Yeddi saatdan çox davam edən son iclasda olduğu kimi, hakim “Gürcü arzusu - Demokratik Gürcüstan” partiyasından olan prosedurun təşəbbüskarları və prezidentin vəkilləri öz mövqelərini təqdim ediblər. Hakim partiya nöqteyi-nəzərindən prezident hökumətin razılığı olmadan xarici səfərlər edərək konstitusiyanı pozub. Zurabişvilinin vəkilləri konstitusiyada prezidentin beynəlxalq münasibətlərdə ölkəni təmsil etməsi ilə bağlı maddəyə müraciət edirlər. Onların fikrincə, Əsas Qanunun 52-ci maddəsinin tələbinə görə, Zurabişvilinin bütün səfərləri Nazirlər Kabineti ilə razılaşdırılmamalıdır.
İclasın sonunda Konstitusiya Məhkəməsinin sədri Merab Turava dinləmələrin oktyabrın 5-də saat 11:00-da davam etdiriləcəyini bildirib.
Sentyabrın əvvəlində Zurabişvili Berlin, Brüssel və Parisə səfər edib və burada yüksək səviyyəli görüşlər keçirib. Sonradan məlum olub ki, Gürcüstan hökuməti onun buna razılıq vermədiyi üçün hakim partiya prezidenti konstitusiyanı pozmaqda ittiham edib və impiçment proseduruna başlayıb. Konstitusiya Məhkəməsi vəsatəti təmin edərsə, Gürcüstan parlamentinin Zurabişvilinin istefası ilə bağlı səsvermə üçün iki həftə vaxtı olacaq. 150 deputatdan 100-ü dəstəkləsə, impiçment baş tutacaq.
