Dünya ifrat sağçıların yüksəlişindən danışarkən Britaniyanın “Observer” qəzeti ifrat sağçı liderləri birləşdirən maraqlı saç üslublarına diqqət yetirib.

"Unikal" xəbər verir ki, "British Observer" qəzetində dərc olunan məqalədə Argentinanın yeni prezidenti Xavyer Miley, Niderlandın yeni baş naziri Geert Uilders, ABŞ-nin keçmiş prezidenti Donald Tramp və İngiltərənin keçmiş baş naziri Boris Consonun saç düzümləri şərh edilib. 

Keçmiş İngiltərə naziri Rori Stüartın “Populizm hər şey saçdan ibarətdir” açıqlamasına toxunan qəzet, 4 sağçı liderin saç düzümü ilə diqqət çəkməsinin təsadüf olmadığını qeyd edib.

Məqalədə Mərkəzi Bankı və mühüm nazirlikləri bağlayacağı vədi ilə mübahisə yaradan Argentinanın yeni lideri Mileyin maraqlı şəxsiyyətini rok ulduz üslubu ilə tamamladığı qeyd edilib.  

Londondakı Kraliça Meri Universitetinin Siyasi Elmlər üzrə professoru Tim Beyl deyib ki, bütün siyasətçilərin brendi var, lakin xüsusilə populist siyasətçilər öz brendlərini dağınıq saçları ilə dəstəkləmək istəyirlər.

Qəzet məşhur adların, aktyorların və müğənnilərin istifadə etdiyi brendləşdirmə üsullarının siyasətçilər tərəfindən istifadə edildiyini qeyd edərək, bunun ən yaxşı nümunəsinin “saçları ilə hər zaman fərq qoyan” Donald Tramp olduğunu yazıb. 

KİV son olaraq məşhur moda jurnalı "Vogue"un keçmiş redaktoru Alexandra Shulmanın sözlərindən sitat gətirib:

"Saçları çox səliqəli olan kişidən daha şübhəli bir şey yoxdur. Dağınıq saçlar sizi çox məşhur insan edir".