Yunanıstanın Baş naziri Kiriakos Mitsotakis və Ukrayna Prezidenti Vladimir Zelenski Odessa şəhərinə səfər edərkən Rusiya qüvvələri şəhərə raket zərbəsi endirib.

"Unikal" xəbər verir ki, bu barədə Yunanıstan OEMA nəşri məlumat yayıb.
Nəşr bildirib ki, Rusiya qoşunları Ukrayna Prezidenti Vladimir Zelenskinin avtomobil karvanını hədəfə alıb, partlayış Baş nazir Mitsotakisin başçılıq etdiyi Yunanıstan nümayəndə heyətindən 150 metr aralıda baş verib.

Nəşrin öz mənbələrinə istinadən məlumatına görə, Yunanıstan nümayəndə heyətinin üzvlərindən heç biri xəsarət almayıb.

"Baş nazirin və ya Yunanıstan nümayəndə heyətinin təhlükəsizliyi ilə bağlı heç bir problem yoxdur", - hökumətin rəsmi mənbələri bildirib.

Yunanıstanın dövlət naziri Stavros Papastavrou nəşrə verdiyi açıqlamada "Hamımız yaxşıyıq" deyib.

Odessada keçirilən mətbuat konfransında Ukrayna Prezidenti Zelenski raket hücumuna toxunaraq: "Hələlik bütün təfərrüatları bilmirəm, amma bilirəm ki, ölənlər və yaralılar var", - deyə bildirib.

Yunanıstanın Baş naziri də partlayış səsini eşitdiyi deyib: "Bizə çox yaxın ərazidə partlayış səslərini eşitdik. Sığınacağa getməyə vaxtımız yox idi; çox təsir edici bir təcrübə oldu".