Yaponiyanın Azərbaycandakı fövqəladə və səlahiyyətli səfiri Vatanebe Katsuya Diasporla İş üzrə Dövlət Komitəsində olub. 

"Unikal" xəbər verir ki, qonağı səmimi salamlayan Komitə sədri Fuad Muradov Komitənin fəaliyyəti, həyata keçirdiyi layihələr, xaricdəki Azərbaycan Evləri, Koordinasiya Şuraları haqqında ətraflı məlumat verib. Komitənin təkcə xaricdə yaşayan azərbaycanlılarla deyil, eyni  zamanda Azərbaycana dost münasibəti bəsləyən ölkələrdə də iş apardığını bildirən Sədr Yaponiyadakı Azərbaycan diasporunun fəaliyyətinin iki ölkə arasındakı münasibətlərin daha da genişlənməsində mühüm rol oynadığını qeyd edib. Komitənin dəstəyilə Yaponiyada gerçəkləşdirilən layihələr barədə fikirlərini bölüşüb. 

Səfir Vatanebe Katsuya səmimi qəbula görə təşəkkür edib. Ötən ilin dekabrından Azərbaycanda fəaliyyətə başladığını söyləyən Səfir azərbaycanlıların Yaponiyaya olan sevgisinin onda xoş təəssürat yaratdığını deyib. O, bundan sonrakı fəaliyyətində Komitə ilə əməkdaşlığa hər zaman hazır olduğunu bildirib.