Qarabağ və Şərqi Zəngəzur regionunu yeni mənbə olaraq qidalandırıb dairəvi elektrik təchizatını gücləndirmək, işğaldan azad edilən ərazilərdə istehsal olunan “yaşıl” enerjini enerjisistemə ötürmək, o cümlədən ixrac etmək və digər mühüm əhəmiyyətli perspektiv məqsədlər üçün həyata keçirilən işlər çərçivəsində 330 kilovoltluq sistem əhəmiyyətli “İmişli” yarımstansiyası “AzərEnerji” tərəfindən genişləndirilərək tam yenidən qurulur.  

"Unikal" xəbər verir ki, bu yarımstansiya da digər yarımstansiyalar kimi dördüncü sənaye inqilabına uyğun olaraq perspektiv nəzərə alınmaqla müasir avadanlıqlarla təchiz edilir. 

Buna qədər isə “İmişli” yarımstansiyasından “Cəbrayıl” Enerji Qovşağına 130 km məsafədə 330 kilovoltluq ötürmə xətti çəkilib və işlər yekunlaşıb, xətt gərginlik altındadır. 

Qeyd edək ki, ölkələrarası beynəlxalq enerji dəhlizi layihəsinin tərkib hissəsi olaraq 330 kilovoltluq “İmişli” yarımstansiyasından başqa 330 kilovoltluq “Ağcəbədi” yarımstasiyası da “AzərEnerji” tərəfindən genişləndirilərək yenidən qurulub və bu yarımstansiyadan Cəbrayıla 132 km məsafədə 330 kV-luq ötürmə xətti çəkilib. Eyni zamanda beynəlxalq əhəmiyyətli “Cəbrayıl” Enerji Qovşağı tikilərək istismara verilib. “İmişli” yarımstansiyasında isə işlərin yaxın aylarda başa çatdırılması nəzərdə tutulub.