01 aprel 2025-cü il tarixində, Qubadlı Rayon İcra Hakimiyyətinin təşkilatçılığı ilə, " Konustitusiya və Suverenlik ili" çərçivəsində, Bakı şəhərində yerləşən II Fəxri Xiyabanda, 27 sentyabr 2020-ci il tarixində başladılmış Vətən müharibəsi zamanı torpaqlarımızın azadlığı uğrunda igidlik göstərərək qəhrəmancasına şəhid olmuş Azərbaycanın Milli Qəhrəmanı, Azərbaycan Silahlı Qüvvələrinin polkovniki Həmidov Şükür Nəriman oğlunun 50 illik yubileyi münasibətilə tədbir keçirilib. 

"Unikal" xəbər verir ki, tədbirdə Qubadlı Rayon İcra Hakimiyyətinin başçısı Malik İsaqov, Milli Məclisin deputatları İmamverdi İsmayılov, Ceyhun Məmmədov, Tərtər rayon İcra Hakimiyyətinin müavini Zabil Paşayev, Hüquq-mühafizə orqanları, YAP rayon təşkilatının rəhbərliyi, Müdafiə Nazirliyinin əməkdaşları, RİH-nin məsul işçiləri, idarə, müəssisə, təşkilat rəhbərləri, RİHB-nın inzibati ərazi dairəsi üzrə nümayəndələri, şəhid ailələri, Vətən Müharibəsi iştirakçıları və qazilər, Milli qəhrəmanımızın döyüş yoldaşları, ailə üzvləri, yaxınları və ictimayyət nümayəndələri iştirak ediblər. 

II Fəxri Xiyabanda Şəhidimizin məzarı üzərinə əklil və gül dəstələri qoyulub, ruhuna dualar oxunub. Tədbir Sumqayıt şəhər 28 May mədəniyyət evində davam etdirilib. 

Əvvəlcə tədbir iştirakçıları tərəfindən torpaqlarımızın bütövlüyü uğrunda canından keçmiş vətən oğullarının xatirəsi bir dəqiqəlik sükutla yad edilib. Dövlət himni səsləndirilib.

Milli Qəhrəmanımızın həyat yolundan bəhs edən video-çarx nümayiş olunub. 

Qubadlı Rayon İcra Hakimiyyəti başçısı Malik İsaqov  çıxış edərək bildirib ki, Sentyabrın 27-dən başlayan, 44 gün davam edən işğal altındakı torpaqlarımızın azad olunması ilə nəticələnən Vətən Müharibəsi tariximizin ən parlaq səhifəsinə, Azərbaycan xalqının iftixar və qürur mənbəyinə çevrilib. Azərbaycan Silahlı Qüvvələri 44 günlük müharibə zamanı əsl vətənpərvərlik və qəhrəmanlıq göstərmiş, düşmənin canlı qüvvəsini, texnikasını məhv edərək Qələbə qazanıb və tarixi ədaləti bərpa olunub. Azərbaycan 30 ilə yaxın davam edən münaqişədə qalib tərəf olub, ərazi bütövlüyümüz bərpa olunub. Bu xoşbəxtliyi, bu qüruru bizə Ali Baş Komandan İlham Əliyev və rəşadətli Azərbaycan Ordusu yaşadıb. Bu müharibə Azərbaycan xalqının, onun Liderinin, şanlı ordumuzun gücünü bütün dünyaya nümayiş etdirib. 

Tədbirdə digər çıxış edənlər şəhid Milli qəhrəmanımız Şükür Həmidov haqqında öz xatirələrini bölüşüblər.

30 ilə yaxın həsrətində olduğumuz Qubadlı rayonu 25 oktyabr 2020-ci ildə şəhidlərimizin qanı və canı bahasına işğaldan azad olunub. 44 günlük Vətən müharibəsində qəhrəmanlar içərisində canından və qanından keçən Qubadlı rayonundan 12 şəhid və 40-dan çox yaralı öz adlarını tarixə yazıblar. Şəhidlərimizin qisası alınıb, qanı yerdə qalmayıb.

Şəhid, Milli Qəhrəman Şükür Həmidovun qardaşı Əsəd Həmidov şəhid ailələrinə göstərdiyi diqqət və qayğıya görə Ali Baş Komandan Prezident İlham Əliyevə, Birinci vitse-prezident Mehriban xanım Əliyevaya və Qubadlı Rayon İcra Hakimiyyətinin başçısı Malik İsaqova minnətdarlığını bildirib. 

Tədbirdə məktəblilərin ifasında qəhrəmanlıq və vətənpərvərlik mövzusunda şerlər səsləndirildi. Şərqi Zəngəzur Regional Mədəniyyət idarəsinin Qubadlı rayon nümayəndəliyi və tanınmış müğənnilərin ifasında muğam parçaları ifa olunub.