Azərbaycan və Almaniya arasında sürətlə inkişaf edən ikitərəfli əlaqələr diplomatik, iqtisadi və humanitar sahələrdə mühüm önəm kəsb edir. Hər iki ölkə arasında əldə edilən mühüm strateji razılaşmalar çərçivəsində əməkdaşlığın genişləndirilməsi bu dost dövlətlərin müxtəlif məsələlərdə bir-birinə əhəmiyyətli dəstəyini təmin edir.

Bunu "Unikal"a açıqlamasında ​Milli Məclisin deputatı Bədəl Bədəlov deyib. 

Deputat bildirib ki, Almaniya Federativ Respublikasının Prezidenti Frank-Valter Ştaynmayerin Azərbaycana səfəri çərçivəsində iki ölkənin dövlət başçıları aprelin 2-də mətbuata bəyanatlarla çıxış ediblər.

"Dövlətimizin başçısı bəyanatında bu səfərin ikitərəfli əlaqələrə yeni müsbət təkan verəcəyini, iqtisadi sahədə əldə edilmiş nəticələrin bizi təbii olaraq ruhlandırdığını bildirib. İqtisadi sahədə Azərbaycan-Almaniya əməkdaşlığı xüsusilə son illərdə sürətlə inkişaf etmişdir. Cari ilin ilk iki ayında iki ölkə arasında ticarət dövriyyəsi təxminən üç dəfə artmışdır. Bunun səbəbi əsasən xam neftin Almaniyaya ixracının artması ilə əlaqədardır. 

Azərbaycan ötən ilin noyabr ayında COP29 tədbirinə uğurla ev sahibliyi edərək qlobal iqlim siyasətinə ciddi töhfələr vermişdir. Almaniya ilə olan sıx əməkdaşlıq ekoloji məsələlərə daha çox diqqət yetirilməsini təmin edir. 

Azərbaycan ilə Almaniya arasında siyasi dialoq həm də regional təhlükəsizlik və beynəlxalq münasibətlərə də təsir edir. Ermənistanla Azərbaycan arasında normallaşma prosesi, xüsusilə münaqişənin başa çatmasından sonra regional sülh və sabitlik üçün böyük əhəmiyyət kəsb edir. Dövlətimizin başçısı, həmçinin qeyd etmişdir ki, Azərbaycan 30 il ərzində erməni işğalından əziyyət çəkmişdir: “Bizim xalqımız etnik təmizləməyə məruz qalmışdır. Bir milyon azərbaycanlı erməni aqressiyasına görə evsiz-eşiksiz qalmışdır və torpaqlarımızın təxminən 20 faizi işğal altına düşmüşdür. Əfsuslar olsun ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir. Məhz bu tarixi Zəfərimiz sülh danışıqlarına yol açmışdır...”. Almaniya Federativ Respublikasının Prezidenti Frank-Valter Ştaynmayerin ölkəmizə ilk rəsmi səfəri dövlətlər arasında tərəfdaşlığın hərtərəfli və yüksələn xətlə inkişafının əyani göstəricisidir. Əminliklə söyləmək olar ki, bu səfər əməkdaşlığın daha yüksək səviyyəyə qaldırılmasına əhəmiyyətli təkan verəcək, gələcək inkişaf üçün böyük perspektivlər açacaq".