Yeni Azərbaycan Partiyası (YAP) Nəsimi rayon təşkilatının sədri Azər Süleymanov və Bakı Slavyan Universitetinin rektoru Anar Nağıyev “Yeni dövrün Azərbaycanı” mövzusunda BSU-nun nəzdində Məktəb-Lisey Kompleksində şagirdlərlə görüş keçiriblər.

"Unikal" xəbər verir ki, görüşdə çıxış edən rayon təşkilatının sədri Azər Süleymanov qeyd edib ki, Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində məhz gənclərin şücaəti və əzmkarlığı sayəsində torpaqlarımız işğaldan azad olunub. O, gənclərin dövlətin inkişafında və milli maraqların qorunmasında mühüm rol oynadığını bildirib.

Məktəb-Lisey Kompleksinin direktoru İlahə Carçıyeva çıxışında belə maarifləndirici tədbirlərin təşkilinə görə BSU rəhbərliyinə təşəkkür edərək, gənclərin milli dəyərlərə bağlı, savadlı və vətənpərvər şəxsiyyətlər kimi yetişməsində bu cür görüşlərin vacibliyini qeyd edib.

Rektor Anar Nağıyev “Yeni dövrün Azərbaycanı” mövzusunda çıxış edərək, Prezident İlham Əliyevin müvafiq Sərəncamına əsasən 2025-ci ilin “Konstitusiya və Suverenlik İli” elan edildiyini diqqətə çatdırıb. O, bu görüşlərin əsas məqsədinin Konstitusiya və suverenlik anlayışlarının mahiyyətini izah etmək, tarixi prosesləri araşdırmaq və bu mövzuda geniş müzakirələr aparmaqdan ibarət olduğunu deyib.

Sonda şagirdlərin sualları cavablandırılıb.