Hindistan hökuməti qadağan olunmuş adada təcrid olunmuş qəbilə ilə əlaqə saxlamağa cəhd edən amerikalını həbs edib.

"Unikal" xarici KİV-ə istinadən xəbər verir ki, polisin məlumatına görə, ABŞ vətəndaşı olan 24 yaşlı Mixail Polyakov martın 26-da Andaman və Nikobar adalarının paytaxtı Port Bleyrə gəlib. 3 gün sonra o, əldəqayırma qayıqla dünyanın ən təcrid olunmuş qəbiləsinin yaşadığı ucqar Şimali Sentinel adasına yola düşüb. Orada olan kimi Polyakov fit və jestlərlə sentinellərin diqqətini cəlb etməyə çalışsa da, heç bir cavab almayıb. Sonra o, sahilə enib, video çəkib və qəbilə üzvlərinə hədiiyyə olaraq bir qutu "Coca-Cola" və kokos qoyub. 

Polyakov materikə qayıtdıqdan sonra yerli balıqçılar tərəfindən görülüb və səlahiyyətlilərə məlumat verilib. Turist qapalı qəbilə rezervasiyasına müdaxilə etdiyinə və yerli qanunları pozduğuna görə dərhal həbs edilib və polis onun qayığını, motorunu və adaya eniş zamanı çəkilmiş video görüntüləri olan GoPro kamerasını ələ keçirib. 

Polyakovun hərəkətləri həm özü, həm də sentinellər üçün məsuliyyətsiz və təhlükəli hesab edilib. Bu qəbilə, qeyd edildiyi kimi, kənar şəxslərə aqressiv reaksiyası ilə tanınır və onların ərazisinə səfər etmək Hindistan qanunları ilə qəti şəkildə qadağandır. Qadağa sentinelləri toxunulmazlığı olmayan xarici xəstəliklərdən qorumaq üçün tətbiq edilib.