Azərbaycan Dövlət Aqrar Universitetinin (ADAU) rektoru Zəfər Qurbanov Macarıstanın Kənd Təsərrüfatı və Həyat Elmləri Universitetindən (MATE) ADAU-ya ezam olunan bir qrup professor-müəllim heyəti ilə görüş keçirib.

"Unikal" xəbər verir ki, görüşdə iki ali təhsil müəssisəsi arasında əməkdaşlıq əlaqələrinin mövcud vəziyyəti, gələcək inkişaf perspektivləri və birgə tədqiqat layihələrinin hazırlanması məsələləri müzakirə olunub. ADAU və MATE arasında kənd təsərrüfatı sahəsində mütəxəssis hazırlığının əhəmiyyəti xüsusi olaraq vurğulanıb.

Həmçinin, müxtəlif ixtisaslar üzrə ikili diplom proqramlarının tətbiqi, tələbə və müəllim mübadiləsi imkanları, elmi əməkdaşlıq və birgə təlim-tədris fəaliyyətləri barədə geniş fikir mübadiləsi aparılıb.

Görüşdə əcnəbi akademiklər kənd təsərrüfatı sahəsində innovativ yanaşmaların tətbiqi, elmi-tədqiqat əməkdaşlığının gücləndirilməsi və akademik əlaqələrin daha da inkişaf etdirilməsi istiqamətində birgə səylərin davam etdiriləcəyini bildiriblər.