Rusiya XİN: Azərbaycan Rusiyanın Cənubi Qafqazdakı strateji tərəfdaşıdır
Rusiya XİN: Azərbaycan Rusiyanın Cənubi Qafqazdakı strateji tərəfdaşıdır

Bunu Rusiya XİN-in mətbuat katibi Aleksandr Lukaşeviç bu gün keçirdiyi brifinqdə bildirib.
Rusiya xarici işlər naziri Sergey Lavrovun iyunun 17-18-də Azərbaycana səfər edəcəyini söyləyən A.Lukaşeviç bildirib ki, bu, artıq iki ölkənin xarici siyasət idarələri rəhbərlərinin cari il ərzində dördüncü görüşüdür: "Azərbaycan bizim Cənubi Qafqazdakı strateji tərəfdaşımızdır. 2013-cü ildə iki ölkə arasında ticarət dövriyyəsinin həcmi 3,5 milyard ABŞ dolları olub. Ticarət dövriyyəsinin həcmi 2012-ci illə müqayisədə 4% artıb. Rusiyanın ixracı təxminən 3 milyard dollar, idxalı isə 640 milyon dollar olub. Azərbaycanda 500-dən çox Rusiya kampaniyası fəaliyyət göstərir".
A.Lukaşeviç qeyd edib ki, hazırda iqtisadi əməkdaşlıq üzrə Rusiya-Azərbaycan Hökumətlərarası Komissiyasının XVI iclasına hazırlıq işləri gedir: "Əməkdaşlığımızda ən vacib komponentlərdən biri Rusiyanın subyektləri ilə Azərbaycan arasında əməkdaşlığın inkişafıdır. İyunun 23-24-də Azərbaycanın Qəbələ şəhərində keçiriləcək V Azərbaycan-Rusiya regionlararası forumuna ümidlərimiz böyükdür. Keçən ilin avqustunda Azərbaycanla Rusiya arasında imzalanan humanitar sahədə əməkdaşlıq haqqında sazişə də xüsusi önəm veririk".