Baş nazirin müavinindən sərt açıqlama
Baş nazirin müavinindən sərt açıqlama
Əli Həsənov:"Beynəlxalq Qızıl Xaç Komitəsinin Azərbaycandakı Nümayəndəliyi haqqında çox ciddi tədbirlər görüləcək, hətta ölkədən çıxarılma həddinə qədər"

Ermənistanın girov götürdüyü azərbaycanlılardan hələ də xəbər yoxdur. Halbu ki, adi qaydalara görə artıq beynəlxalq təşkilatlar məsələyə reaksiya verməli və Qızıl Xaç Komitəsinin nümayəndələri girovlarla təmasda olmalı idilər. Bəs nəyə görə hələ də problem həllini tapmayıb? Gəlin öncəliklə rəsmi açıqlamaya diqqət yetirək. Beynəlxalq Qızıl Xaç Komitəsinin İrəvan və Xankəndi ofislərinin əməkdaşları işğal altında olan Kəlbəcər rayonunda girov götürülən azərbaycanlılarla görüşə bilməyiblər. Bunu baş nazirin müavini, Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov deyib.
O bildirib ki, Ermənistan tərəfi əsir və girov götürülmüş şəxslərlə davranış qaydalarını tənzimləyən beynəlxalq aktları pozur: "Onlar haqda xəbər yayıldıqdan dərhal sonra cənab prezident bu məsələni şəxsən nəzarətə götürdü, müvafiq qurumlara tapşırıqlar verdi. Onun göstərişinə əsasən mən BQXK-nın Bakı ofisinin rəhbərliyi ilə görüşdüm. Onlar da İrəvan və Xankəndi ofisləri ilə əlaqə saxlayıblar. Ancaq bu günə qədər girov götürülən Dilqəm və Şahbazla görüşmək mümkün olmayıb. Biz bilirik Ermənistanda onlara qarşı hansı vəhşilikləri edirlər".
Əli Həsənovun sözlərinə görə, hazırda düşmən əlində olan şəxslər əsil vətənpərvər insanlardır: "Təəssüf edirəm ki, Azərbaycan parlamentinin üzvləri, yüksək vəzifəli şəxslər, QHT nümayəndələri arasında Dilqəmi, Şahbazı qınayanlar var, amma unutmaq lazım deyil ki, o torpaqlar Azərbaycan torpaqlarıdır. Bir kəs ki, ölümü gözə alıb doğulduğu yerlərə gedir, deməli o, çox vətənpərvər adamdır. Üzümü həmin qınaq dolu müsahibələr verən adamlara tutub deyirəm ki, bəsdir, belə şeylərə yol vermək olmaz!"
Ə. Həsənov qeyd edib ki, əgər Ermənistan rəhbərliyi, bu ölkənin xüsusi xidmət orqanları o iki şəxsə qarşı amansız davransalar, xalqlar arasındakı nifrət daha da artacaq: "Ermənistan rəhbərliyi və xüsusi xidmət orqanları başa düşməlidir ki, hansısa erməni Azərbaycana əsir düşə bilər, onda Azərbaycan tərəfi Şahbaz və Dilqəmə qarşı yol verilən amansızlıqları həmin erməniyə tətbiq edə bilər. Və Ermənistan anlamalıdır ki, bizim aidiyyəti orqanlarımız soydaşlarımıza qarşı amansızlıqlara göz yummayacaq.Kəlbəcərdə girov götürülənlərlə qısa müddətdə görüş alınmasa, BQXK-nın Azərbaycandakı Nümayəndəliyi haqqında çox ciddi tədbirlər görüləcək, hətta ölkədən çıxarılma həddinə qədər..." Ə. Həsənov bildirib ki, Kəlbəcər rayonu ərazisində girov götürülmüş azərbaycanlılarla bir həftə ərzində görüşün alınmaması BQXK-nın fəaliyyətini şübhə altına alır: "Azərbaycan tərəfinə əsir düşənlərin, girov olanların hansına işgəncə verilib? Nə üçün Azərbaycan tərəfinə bir erməni girov düşən kimi BQXK Azərbaycan hökumətinə müraciət edir və dərhal görüş təmin edilir. Ermənistan tərəfi nə üçün etmir? Ona görə də mən BQXK-nın Azərbaycan nümayəndəliyinin rəhbərliyi ilə görüşdə ciddi xəbərdarlıq etdim ki, əgər buna nail olmasalar, Beynəlxalq Qızıl Xaç Komitəsinin Azərbaycandakı Nümayəndəliyi haqqında çox ciddi tədbirlər görüləcək, hətta ölkədən çıxarılma həddinə qədər... Zəhmət çəkib tədbir görsünlər".İndi isə qayıdağın əsas suala,nədən bu günə qədər girovlarla görüş təşkil edilməyib? Təxminən bir neçə ay öncə bir Ermənistan vətəndaşı Azərbaycan sərhədlərini pozarkən Tovuzda həbs edilmişdi. Həbsindən 1 gün sonra isə artıq Qızıl Xaç Komitəsi əsir götürülən erməni ilə görüşü təmin etdi və bir həftədən sonra Ermənistana qaytarıldı. Amma bu gün bunun tam əksini görürük. Ekspertlər hesab edir ki, hazırda Qızıl Xaç Komitəsi ermənilərin mövqeyinə uyğun mövqe sərgiləyir və Ermənistan tərəfinə imkan yaradır ki, girovlarla istədikləri kimi rəftar etsinlər və təzyiq yolu ilə nə isə əldə edə bilsinlər. Halbu ki, girovlarla istənilən an görüş əldə etmək mümkündür. Buna görə də Azərbaycan tərəfinin sərt bəyanatla çıxış etməsi başa düşüləndir. Bundan başqa, erməni əsirlə bağlı o zaman dərhal ATƏT-in Minsk qrupunun həmsədrləri bəyanatla çıxış edərək əsrin azadlığa buraxılmasını tələb etdilər. Amma bir həftədən artıqdır ki, iki azərbaycanlı girovluqdadır, amma bir dəfə də olsa ATƏT-in Minsk qrupunun həmsədrlərindən səs çıxmayıb. Bütün bunlar isə təsdiqləyir ki, həqiqətən də məsələyə yanaşmada beynəlxalq güclər erməni mövqeyinə daha yaxındırlar və buna görə Azərbaycan tərəfi konkret addımlar atmalıdır.
Mehdi Əli