Prezident NATO-da Qarabağdan danışdı
Prezident NATO-da Qarabağdan danışdı
İlham Əliyev: "Regionumuzdakı təhlükəsizliyə ən böyük hədə Ermənistanın işğalçılıq siyasətidir".
Prezident İlham Əliyevin NATO-un zirvə toplantısındakı iştirakı yetərli qədər uğurlu oldu. İlk növbədə prezident bu toplantıya qatılmaqla bir daha təsdiqlədi ki, Avropaya inteqrasiyada maraqlıdır və Azərbaycanın Avrasiya İttifaqına qoşulması gündəmdə deyil. Bununla paralel olaraq prezident çıxışında bir daha sübut etdi ki, Azərbaycan ikitərəfli münasibətlərin qurulmasında maraqlıdır və bununlada neytrallığını qoruyacaq. Məsələn, bu günün özündə Moldova, Gürcüstan və Ukrayna NATO-ya üzv olmağa çalışsalarda Azərbaycanın belə bir istəyi yoxdur və NATO ilə sadəcə bəzi məsələlərdə əməkdaşlıqda maraqlıdır. Bunu da qeyd edək ki, hazırda Azərbaycan Əfqanıstan məsələsində NATO ilə sıx əməkdaşlıq edir və bu davam etdiriləcək. İndilikdə isə gəlin prezidentin çıxışındakı bəzi məqamlara diqqət yetirək.
"Azərbaycan ilə NATO arasında tərəfdaşlığın iyirmi ili ərzində ölkəmiz Alyansın bir çox fəaliyyət sahəsinə töhfə verən etibarlı tərəfdaşa çevrilib. Azərbaycan regional təhlükəsizlik və sabitlikdə mühüm rol oynayır. Bununla belə, bu gün regionumuzdakı təhlükəsizliyə ən böyük hədə Azərbaycan ərazisinin iyirmi faizini təşkil edən Dağlıq Qarabağ və yeddi ətraf rayonu işğal altında saxlayan Ermənistanın işğalçılıq siyasətidir".
Bunu prezident İlham Əliyev NATO-nun Zirvə toplantısının Əfqanıstan üzrə görüşündə çıxışı zamanı deyib. İ. Əliyev bildirib ki, Ermənistan azərbaycanlılara qarşı etnik təmizləmə siyasəti həyata keçirib və bunun nəticəsində 1 milyondan artıq insan qaçqın və məcburi köçkün vəziyyətinə düşüb: "BMT Təhlükəsizlik Şurasının 4 qətnaməsi Ermənistan qoşunlarının işğal edilmiş ərazilərdən dərhal və qeyd-şərtsiz çıxarılmasını tələb edir. Əfsuslar olsun ki, Ermənistan onlara məhəl qoymamaqda davam edir və münaqişə həll olunmamış qalır. Münaqişə beynəlxalq hüquq normaları və Azərbaycanın ərazi bütövlüyü əsasında həll edilməlidir.Biz NATO-nun bu məsələ ilə bağlı mövqeyini və əvvəlki sammitlərdə Azərbaycanın ərazi bütövlüyü və suverenliyinə verdiyi tam dəstəyi yüksək dəyərləndiririk. Biz qətiyyətlə inanırıq ki, NATO-nun beynəlxalq hüququn bu cür mühüm hissəsinə sadiqliyi bundan sonra da davam edəcək. Beləliklə, o, ədaləti bərpa etməyə və beynəlxalq səviyyədə tanınmış sərhədləri güc hesabına dəyişmək kimi səhv düşüncədən yayındırmağa birmənalı şəkildə yardım edir.
Azərbaycan Əfqanıstana uzunmüddətli inkişafın təmin edilməsi üçün hərtərəfli töhfə verir. Azərbaycan bu sammitin bütün üç sahəsinə töhfə verən NATO-nun 5 tərəfdaşından biridir. Azərbaycanın hərbi kontingenti lap ilkin vaxtlardan İSAF qüvvələrində xidmət edir. Azərbaycanın müxtəlif akademiyalarında Əfqanıstanın hüquq mühafizə və hökumət rəsmiləri üçün geniş təlim proqramları həyata keçirilir. Əfqanıstanın Milli Ordusunun Qəyyumluq Fonduna 3 milyon avro keçirilib, digər 1 milyon isə istehkam əməliyyatlarına sərf olunub.
İSAF qüvvələri üçün məhvetmə gücünə malik olmayan malların tranzitinin 40 faizi Azərbaycan tərəfindən təmin edilir. Bundan əlavə, gələcəkdə iştirak edəcəyimiz "Qətiyyətli dəstək" əməliyyatı üçün mühüm tranzit imkanları yaradacaq Bakı-Tbilisi-Qars dəmir yolu xəttinin çəkilməsi gələn bir neçə ay ərzində başa çatdırılmalıdır. Xəzər regionunda ən böyük Azərbaycan Beynəlxalq Dəniz Limanı ilə birgə bu dəmir yolu xətti həm bütün region, həm Əfqanıstan üçün böyük ticari və iqtisadi imkanlar açacaq. Bu, Uzaq Şərq ilə Avropanı birləşdirən marşrutun tam ortasında yerləşən Əfqanıstana iqtisadi inkişaf verə bilər. Müstəqilliyin ilk illərində durğunluq və böhrandan davamlı sabitlik və surətli iqtisadi artıma keçmiş ölkə kimi Azərbaycan öz təcrübəsini Əfqanıstan ilə bölüşməyə və həmin ölkədə müxtəlif yenidənqurma və sərmayə layihələrində iştirak etməyə hazırdır". Ekspertlər hesab edir ki, NATO və Avropa Birliyidə əslində Azərbaycanın tutduğu mövqedən razıdırlar. Çünki Azərbaycan bitərəfliyini qorumaqla həmdə regionda stabilliyin saxlanılmasına təsir edir, Gürcüstan kimi yardıma ehtiyacı olan bir ölkəyə dəstəyini əsirgəmir. Başqa sözlə desək Azərbaycan prinsipcə Avropanın şərqdə tək qalasıdır. Çünki Ermənistan birmənalı şəkildə Rusiyanın təsiri altındadır və Azərbaycan mövcudluğu ilə Rusiyanın regiona bir başa nüfuz etməsinin qarşısını alır.
Mehdi Əli