Bağlanacaq məmur bankları haqqında yeni və müdhiş iddialar

Bağlanacaq məmur bankları haqqında yeni və müdhiş iddialar

2015-ci ilin yanvarından etibarən qapadılacaq bankların siyahısı "Unikal"da!
Azərbaycan Mərkəzi Bankının (AMB) kommersiya banklarının kapitallaşmasının artırılması ilə bağlı qoyduğu müddətə cəmi 2 ay vaxt qalıb.

Belə ki, 2015-ci ilin yanvarın 1-dək nizamnamə və məcmu kapitalını 5 dəfə artırıb 50 milyon manata çatdırımayan bank bazarı ya tərk edəcək, ya da digər banka birləşdiriləcək.
MB-nın maliyyə təşkilatlarının fəaliyyəti ilə bağlı hesabatlarına əsaslansaq, 5 bankın bazarı tərk edəcəyi istisnasızdır. Çünki ilin ikinci rübünün nəticələrinə görə, 5 bank ləğv etmə prosesində olub. 8 bank isə zərərlə işləyib. Bank sisteminin cəmi zərəri zərərlə işləyən banklar üzrə - 42,44 milyon manat təşkil edir. Hazırda sual yaradan zərərlə işləyən və ləğvetmə prosesində olan bankların kimliyidir. Mərkəzi Bank həmin bankların işgüzar nüfuzunu nəzərə alaraq adlarını açıqlamır.
Bu arada məcmu və nizamnamə kapitalı ilə bağlı qarşıya qoyulan öhdəlikləri yerinə yetirməyən bankları müəyyənləşdirmək mümkün olub. Böyük ehtimalla iki ay sonra məhz həmin banklar bağlanacaq.
Bu sıraya "Günay Bank" Səhmdar Kommersiya Bankı daxildir. Bank sonuncu audit hesabatını 2013-cü il üzrə verib. Dekabrın 30-na olan məlumata görə, bankın cəmi öhdəlikləri və kapitalı 34, 760,858 milyon manat olub. 2012-ci ildə bu rəqəm 34,447,565 milyon manat təşkil edib. Göründüyü kimi, artım cüzidir. Nəzərə alsaq ki, cari ildə MB bankların gəlir mənbəyi olan kreditlərin məhdudlaşdırılması ilə bağlı bir sıra qərarlar qəbul edib, bankın qoyulan tələbi yerinə yetirəcəyi sual altındadır.
"Azərbaycan Kredit Bank"nın 2014-cü ilin iyun ayına olan hesabatına görə, bankın məcmu kapitalı 17,294,472.72 min manat təşkil edib.
30.06.2014-cü il tarixinə olan məlumata əsasən "ATRABANK" ASC-nin məcmu kapitalı 21 320.73 min AZN təşkil edib. Onlardan 20 702.36 min AZN bankın əsas kapitalının payına düşür, 644.69 min AZN isə II dərəcəli kapitala aiddir.
Kapital qıtlığı yaşayan banklardan biri də "Bank Avrasiya"dır. Bankın cari ilin iyun ayına olan kapitalın strukturu və adekvatlığı barədə hesabatına görə, bankın məcmu kapitalı 30, 849.1 mln manat təşkil edib.
Son zamanlar ciddi maliyyə böhranı ilə üzləşdiyi qeyd edilən "Bank of Azerbaijan" da bu sıraya aiddir. Hələ ötən il maliyyə təşkilatının vəziyyətinin normal olduğu zamanda bankın kapitallaşması 33,6 milyon manat olub.
"Deka Bank"ın sentyabra olan məlumatına görə, məcmu kapitalı 13010.20509 min manat təşkil edib.
Növbəti sırada "NBC Bank" gəlir. 2014-cü ilin ikinci rübünə olan məlumata görə, bankın məcmu kapitalı 38,532 milyon manat olub.
"Parabank" bu bankın da məcmu kapitalı Mərkəzi Bankın qoyduğu tələbə uyğun gəlmir. Cari ilin iyun ayına olan hesabata görə, bankın məcmu kapitalı 21 milyon 662 min manat olub.
"Yunayted Kredit Bank"ın iyul ayına olan kapitalın adekvatlığı hesabatında bankın məcmu kapitalının həcmi 27864.24 min manat göstərilib.
"Zamin Bank"ın məcmu kapitalı isə aprelin 1-nə 47 milyon manat olub.
"Naxçıvanbank" isə ümumiyyətlə 2011-ci ildən bu tərəfə maliyyə hesabatını açıqlamayıb.
31 mart 2014-cü il tarixinə "KredoBank"ın nizamnamə kapitalı 50,540,000 min manat olub. Bank məcmu kapitalının həcmini göstərmir.
Qeyd edək ki, Azərbaycanın bank sektorunda fəaliyyət göstərən qurumların əksəriyyəti ayrı-ayrı məmurların birbaşa və dolayısı ilə nəzarətindədir. İstisna deyil ki, bağlanması gözlənilən 10 bank arasında da müəyyən vəzifəli şəxslərin himayəsində olan banklar var.
Bu isə həmin məmurların faktiki olaraq "bank bizneslərini" itirməsi anlamına gəlir. Mümkündür ki, belə məmurlar hökumət içində istənilən qədər nüfuz və təsir imkanlarına malik deyillər. Bu səbəbdən də onlar öz banklarının mövcudluqlarını qorumaqda çətinlik çəkəcəklər.
Şübhəsiz ki, iri məmurların banklarının hər hansı təhlükə qarşısında olduğunu söyləməyə dəyməz. Belə ki, "Bank of Azərbaycan", Mərkəzi Bankın rəhbəri Elman Rüstəmovun "Bank Respublika"sı, Dövlət Neft Şirkətinin prezidenti Rövnəq Abdullayevin "Xalq Bank", AZAL prezidenti "Silk Way Bank"ı kimi banklar mövcudluqlarını hər bir halda davam etdirəcəklər.
Əvəzində isə daha zəif məmurlara məxsus banklar bağlanacaq. Bununla həm də oliqarx banklarının meydanı daha da genişlənmiş olacaq.
Ülviyyə Qasımlı