Füzuli Ələkbərovun federasiyasında ara qarışdı
Füzuli Ələkbərovun federasiyasında ara qarışdı

Keçmiş nazirin rəhbərlik etdiyi qurumda niyə narazılıq yaranıb?

Son zamanlar cüdoda axsamalar baş verir. Cüdoçularımız, demək olar ki, bütün yarışlardan pis nəticə ilə qayıdırlar.
Bu yaxınlarda Özbəkistanın paytaxtı Daşkənddə cüdo üzrə Qran-Pri turnirindəki yeganə təmsilçimiz Mahir Cəfərli yarışa getdiyinə peşman olub.
66 kq çəki dərəcəsində qüvvəsini sınayan həmyerlimiz ilk qarşılaşmasında rusiyalı Denis Lavrentiyevə məğlub olmuşdu. Rəqib isə 1/4 final səddini keçə bilmədiyindən Cəfərli turnirlə vidalaşıb.
Son vaxtlar cüdo federasiyasının uğursuzluğu rəhbərliyin də qəzəbinə səbəb olub. Federasiyaya yaxın mənbədən əldə edilən məlumata görə, rəhbərlik xüsusi iclas keçirmək fikrindədir. Belə ki, qurumda kimin qalacağı, kimin gedəcəyi məsələləri ciddi müzakirə olunacaq. Cüdoçularımızın uğursuzluğu federasiyanı medal üzünə həsrət qoyub.
Federasiyadan qovulacaqlar siyahısına 3 nəfərin adı salınıb. Hazırda onların kimliyi barədə dəqiq məlumat yoxdur.
Hazırda federasiyada vitse-prezident postu tutan Elnur Məmmədlinin aqibəti ilə bağlı heç bir məlumat yoxdur.
Amma millinin baş məşqçi Hacıağa Hacıəhmədovun da postunun dəyişiləcəyi deyilir. Çünki Hacıağa müəllimin gəlişindən sonra millinin uğurlarında heç də irəliləmə olmayıb. Əksinə, idmançıların uğursuzluqları daha çox olub.
Aldığımız digər məlumata görə isə, H.Hacıəhmədovun yerinə əcnəbi mütəxəssisin gələcəyi də deyilir.
Xatırladaq ki, Azərbaycan Cüdo Federasiyasına sabiq əmək və əhalinin sosial müdafiəsi naziri Füzuli Ələkbərov rəhbərlik edir. Keçmiş nazir vəzifəsindən kənarlaşdırılmasına baxmayaraq federasiya prezidenti postunda qalır.
Fuad Əliyev