Bakıda məsciddə törədilən yanğınla bağlı cinayət işi başlanıb

Bakının Qaraçuxur qəsəbəsində yerləşən məsciddə törədilmiş yanğın hadisəsi ilə bağlı cinayət işi başlanıb.
Baş Prokurorluğun mətbuat xidmətinin rəhbəri Eldar Sultanov bildirib ki, məsciddə törədilən cinayət faktına görə, Suraxanı Rayon Polis İdarəsinin İstintaq Şöbəsində Cinayət Məcəlləsinin 134-cü (öldürməklə və ya sağlamlığa ağır zərər vurmaqla hədələmə) maddəsi ilə cinayət işi başlanıb, hazırda iş üzrə müvafiq istintaq hərəkətləri davam etdirilir. Qeyd edək ki, noyabrın 25-dən 26-a keçən gecə naməlum şəxslər Qaraçuxur qəsəbəsində yerləşən məscidə içərisində yanacaq olan şüşə qab atıblar. Nəticədə məsciddə yanğın olub. Məsciddə olan şəxslərin səyi nəticəsində yanğının qarşısı alınıb. Hazırda polis məscidi yandırmağa cəhd göstərən şəxslərin müəyyən edilərək tutulması istiqamətində əməliyyat-axtarış tədbirlərini davam etdirir.