Millət vəkili Qənirə Paşayeva Suraxanı rayonunda H.Əliyev Mərkəzində Bakı Şəhər Mədəniyyət və Turizm Baş İdarəsi, H.Sarabski adına Mədəniyyət Evinin "Bizim Evin Qonaqları" layihəsinin qonağı olub.
Unikal.org bildirir ki, kitab həvəskarlarının toplandığı tədbirdə Qənirə Paşayevanın kitablarının imza mərasimi də baş tutub. Kitabsevərlərlə bir arada olmaqdan məmnun olduğunu dilə gətirən Qənirə Paşayeva ilk öncə bütün insanlarımızı Dövlətimizin Müstəqilliyinin bərpasının 25 illiyi münasibəti ilə təbrik edib, dövlətimizin keçdiyi yoldan, əldə etdiyi uğurlardan və onun daha da inkişafı üçün hər bir vətəndaşımızın üzərinə düşən vəzifələr barədə geniş söhbət açıb. Tədbiri məhz belə bir gündə təşkil etdikləri üçün təşkilatçılara təşəkkürünü bildirən millət vəkili Q.Paşayeva bu görüşü əhəmiyyətli hesab etdiyini vurğulayıb. O qeyd edib ki, cəmiyyətin maariflənməsi, xüsusilə də savadlı, intellektual,vətənpərvər, daxili dünyaları zəngin olan gəncliyimizin yetişməsində və dünyagörüşümüzün formalaşmasında mütaliə xüsusi əhəmiyyət kəsb edir. Bu baxımdan da bu cür görüşlərin keçirilməsi cəmiyyətdə kitaba və mütaliəyə olan marağın artırılmasında mühüm rol oynayır.
Oxucularla yaradıcılığı və kitablarla bağlı müzakirə aparan Qənirə Paşayeva həmçinin onları maraqlandıran digər sualları da cavablandırıb.
Millət vəkili Qənirə Paşayeva tədbirin təşkilatçılarına və iştirakçılarına minnətdarlığını bildirib, öz imzası ilə kitablarını oxuculara hədiyyə edib.
Bu cür maraqlı tədbir üçün təşəkkürünü bildirən millət vəkili Q.Paşayeva cəmiyyətdə kitaba meyilliliyin artması istiqamətdə ziyalıların üzərinə böyük vəzifələr düşdüyünü də vurğulayıb.
