"Arzuları ilə bir yerdə getdi Fərəhim....

Unikal.org xəbər verir ki, bunu AzNews.az-a açıqlamasında 12 yaşlı Fərəf Yaqubovanın 3 mərasimində mərhumun anası Şahnaz Əliyeva deyib. Əlləri hər yerdən üzülən ananı heç nə ovundura bilməyib:
"Fərəh məni tək qoyub getdi. Bala anasına qarşı necə etibarsız olarmış? 33 şagirdin hamısını qızıma görə çox istəyirdim. Ay Allah, sənə neynəmişdim. Allah heç bir anaya bala dağı göstərməsin. Hər gün Fərəhi dərsə öpüb yola salırdım. Deyirdi "ay ana gəl küçədə görüşək. Razı olmurdum. Qonşunun uşağı baxırdı, anasız idi, istəmirdim ki, bizi görüb yetimliyini hiss etsin. Bütün zəhmətim heçə getdi. Anan qurban sənə, məni niyə tənha qoydun Fərəh? Arzuları ilə qoşa gedən Fərəhim can. Fərəf mənə elə bir dağ verdi ki...Toyu qiyamətə qalan balam can. Gəlin olmayan Fərəhim lay-lay. Bircə arzum vardı, onu oxudub ağ paltarda gəlin köçürmək. Balamı gəlin donuna deyil, kəfənə bürüdüm.

Fərəh Yaqubovanın sinif yoldaşlarının valideynləri də onun niyə belə addım atdığını başa düşmürlər.

Ülviyyə Babayeva: "Biz bu hadisədən şokdayıq. Fərəhgilin sinfində 30 şagird təhsil alır. Çox mehriban sinifdi. Onların sinfi məktəbdə birincidir. Bütün bayramlarda başda olub. Tədbirlərin yaxşı əhval-ruhiyyədə keçirilməsinin səbəbkarı Fərəhin anası Şahnaz xanım olub. Fərəhin ölümü ilə bağlı dəqiq heç nə bilmirik. Ondan-bundan eşitmişik ki, dərman içib. Fərəh əla oxuyurdu. Amma qismət deyilən şey var. Çox heyif ki, belə bir uşağın ömrü yarımçıq qaldı.

Natavan Hüseynli: "Şahnaz xanımın sayəsində şagirdlər Qubaya səfər edərdilər. Fərəh yaxşı bir həyat tərzi keçirib. Heç nəyə ehtiyacı olmayıb. Anası qoymayıb ki, o, nədənsə korluq çəksin. Onun anası kimi uşağının nazı ilə oynayan olmayıb. Uşaq getdi, ana da şam kimi yandı. Hamı pis olub. Fərəhin bir xalasının qızı vardı. 2-ci sinifdə oxuyanda xərçəng xəstəliyindən ölüb. O gündən illər keçib, amma Fərəh hələ də onun fikrini edirdi. Onunla bir yerdə yaşayıb, bacı kimi olublar. Onun ölümü şagirdləri də sarsıdıb. Onlar üçün çətin olacaq.

Sevda Quliyeva: "Fərəh qəşəng və nazlı qız idi. Azca da forsu vardı. Həyata baxışı hamıdan seçilirdi. Anası həmişə ona seçilən ad günü keçirərdi. Bütün ad günləri bir yerdə restoranlarda qeyd edərdik. Sonuncu ad gününü oktyabrda qeyd elədi. Nədənsə ora getməmişdim. Yamanca incimişdi. Valideynlərin hamısı onu çox istəyirdi. Çoxlu şəkil çəkdirərdi.

Xatırladaq ki, 12 yaşlı Fərəh Yaqubova Badamdard qəsəbəsindəki evində nənəsinin qan təzyiqini aşağı salan dərmanlarını içdikdən sonra dünyasını dəyişib.

Faktla bağlı araşdırmalar davam edir.