Bakıda 5 saylı Şəhər Klinik Xəstəxanasında yırtıq əməliyyatı zamanı dünyasını dəyişən Məmmədova Vüsalə Hümmət qızının qanaxmadan dünyasını dəyişməsi ilə bağlı onun yaxınlarının səsləndidikləri iddia öz təsdiqni tapmayıb.

Unikal.org Trend-ə istinadən xəbər verir ki, bu barədə Azərbaycan Səhiyyə Nazirliyi Məhkəmə-Tibbi Ekspertiza və Patoloji Anatomiya Birliyindən məlumat verilib. Bildirilib ki, mərhumun yaxınları ölümün qanaxmadan baş verməsindən şübhələnirdilər. Lakin ilkin rəyə əsasən, V.Məmmədovada qanaxma baş verməyib. Artıq bu barədə mərhumun yaxınlarına da məlumat verilib.

Ölümün dəqiq səbəbləri isə tədqiqat üçün alınan materialların mikroskapik müayinəsi nəticəsində məlum olacaq. Bu müayinənin nəticələri 2 həftə ərzində məlum olacaq.

Xatırladaq ki, Məmmədova Vüsalə Hümmət qızı yanvarın 11-də dünyasını dəyişib. Mərhumun yaxınları ölümə səbəbin həkim səhlənkarlığı olduğunu, həkimin əməliyyat zamanı səhvən xəstənin damarını zədələdiyini və nəticədə də onun qanaxmadan dünyasını dəyişdiyini iddia edirdilər. Mərhumun 3 uşaq anası olduğu bildirilir.