Dekabrın 31-dən yanvarın 1-nə keçən gecə İstanbulda "Reina gecə klubunda terror törədən özbək əsilli, Əbu Məhəmməd Horasani kod adlı Əbdülqədir Maşaripovun İstanbul Terrorla və Mütəşəkkil Cinayətkarlıqla Mübarizə Şöbəsində sorğusu hələ də aparılır.

Unikal.org-un məlumatına görə, "Hurriyet İŞİD-çi Maşaripovun 16 günlük axtarışının təfərrüatlarını və yaxalandığı ilk anın fotosunu əldə edib.

Məlum olub ki, Maşaripov qətliamdan sonra qaçarkən Ulusda evlərdən birində gizlənib və orada itin hücumuna məruz qalıb. İtlə boğuşandan sonra xilas olan Əbdülqədir daha sonra 3 taksi dəyişərək Zeytinburnuna gedib.

Terrorçu İstanbul polisi tərəfindən saxlanılana qədər, yəni 16 gün ərzində 480 evə hücum edilib, 214 nəfər saxlanılıb.

Qeyd edək ki, İstanbulun Esenyurt vilayətində İŞİD hücrəsinə edilən hücum nəticəsində Ə. Maşaripovla birlikdə daha 4 nəfər saxlanılıb. Onlardan 1-nin qırğız əsilli kişi, digər 3-nün qadın olduğu bildirilir.

Ə. Maşaripovun 2 il ərzində Əfqanıstan və Pakistanda təlim gördüyü, özbək, rus, ərəb, çin dillərini və türkiyə türkcəsini bildiyi deyilir.

Xatırladaq ki, "Reinada törədilmiş terror aktı nəticəsində 39 nəfər ölmüş, 66 nəfər isə yaralanmışdı.