Dələduzluqda təqsirləndirilən Nigar Abdullayeva barəsində olan hökmdən kasasiya şikayəti verib.

Unikal.org Teleqraf.com-a istinadən xəbər verir ki, Ali Məhkəmə iclası noyabrın 29-na təyin edib.

İşə hakim Tahir Kazımovun sədrliyi ilə baxılacaq. Salyan rayonunun keçmiş icra başçısı Seyran Seyranovun qızı, 1982-ci il təvəllüdlü Nigar Abdullayeva 2014-cü ilin sentyabr ayına kimi İqtisadi İnkişaf Nazirliyinin (hazırda İqtisadiyyat Nazirliyi) Protokol şöbəsinin rəisi olub. O, 500 min manat pulu dələduzluq yolu ilə ələ keçirməkdə təqsirləndirilib.

Nigar Abdullayeva turizm agentliyi qurmaq adı ilə 19 nəfərdən külli miqdarda pul alıb və qaytarmayıb. O, Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsi ilə ittiham olunub.

Bakı Ağır Cinayətlər Məhkəməsinin hökmü ilə Nigar Abdullayeva 8 il müddətinə azadlıqdan məhrum edilib. Hökmdən narazı qalan Nigar Abdullayeva apelyasiya şikayəti verib. O, cəzasının yüngülləşdirilməsini istəyib. Hakim Mirpaşa Hüseynovun sədrliyi ilə keçirilən iclasda qərar elan olunub. Qərara əsasən, Nigar Abdullayevanın apelyasiya şikayəti təmin edilməyib.

Qərardan narazı qalan Nigar Abdullayeva kasasiya şikayəti verib.