Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu (KİVDF) 22 iyul milli mətbuatın yaranmasının 141 illiyi ilə əlaqədar fərdi jurnalist yazıları müsabiqəsi elan edib.
Fonddan unikal.org-a bildirilib ki, Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası ilə müəyyən edilmiş dövlət dəstəyinin prioritet sahələrinə uyğun olaraq 19 istiqamət üzrə yazılar qəbul ediləcək.
Müsabiqə elan olunan günədək ən azı bir il müddətində kütləvi informasiya vasitələrində (qəzet, jurnal və informasiya agentliklərində) fasiləsiz çalışan şəxslər müsabiqədə iştirak edə bilərlər.
Yazılar mövzunun əhatə olunması, jurnalist araşdırması, materialın oxucu üçün informasiyalılıq səviyyəsi, yazının dil və üslub xüsusiyyətləri, bədii-estetik ifadəsi, jurnalist obyektivliyi, qərəzsizliyi, tərəfsizliyi və məsuliyyəti, ictimai maraqların müdafiəsi meyarları üzrə qiymətləndiriləcək.
Hər istiqamət üzrə 6 qalib müəyyən edilir. Birinci yer üçün 500 AZN (bir nəfər), ikinci yer üçün 400 AZN (iki nəfər), üçüncü yer üçün 300 AZN (üç nəfər) məbləğində mükafat müəyyən olunub. Yazılar 10 ballıq sistem üzrə qiymətləndirilir. Maksimum 50 baldır.
Ətraflı məlumatı KİVDF-nin saytından əldə etmək olar.
