Bu il “Azəri-Çıraq-Günışli” (AÇG) yataqlar blokunun işlənməsi ilə bağlı Azərbaycan hökuməti ilə imzalanmış sazişin (“Əsrin müqaviləsi”) 25 illik yubileyi qeyd olunacaq.

Unikal.org xəbər verir ki, bunu bunu BP-nin Azərbaycan, Gürcüstan və Türkiyə üzrə regional prezidenti Qari Couns təmsil etdiyi şirkətin 2018-ci ildəki fəaliyyəti və 2019-cu il üçün planları ilə bağlı keçirilən mətbuat konfransında bildirib.

“Biz AÇG-nin gələcəyinə inanırıq və bu səbəbdən də bu müqavilənin müddətini artırdıq. Bu ilin II rübündə yataqlar blokunda daha bir platforma inşa edəcəyik. Bu, yeni müqavilə əsasında inşa edilən ilk platforma olacaq və “Mərkəzi-Şərqi Azəri” platforması adlanacaq. Bu platformanın inşası və istifadəyə verilməsi ilə bağlı hökumətlə sıx əmədaşlıq edirik. Hazırda bizim hökumətə ilkin təkliflərimiz var. Bu layihənin daha da səmərəli olması üzərində iş aparılır”, - deyə o, qeyd edib.

Xatırladaq ki, “Mərkəzi-Şərqi Azəri” platforması AÇG müqaviləsi ərazisinin işlənməsinin növbəti mərhələsini təşkil edir. Bu layihənin məqsədi əlavə quyuları qazmaqla və əlavə dəniz obyektləri quraşdırmaqla, gündə 100 min barelə qədər neft və 350 min standart kubfut qaz təşkil edən pik hasilat həcminə nail olmaqdır.

“Azəri Mərkəzi Şərqi” layihəsinin suyun, təxminən, 137 metr dərinliyində, “Mərkəzi Azəri” (MA) və “Şərqi Azəri” (ŞA) platformaları arasında yerləşdiriləcək yaşayış bloklu hasilat və qazma platformasından, üç yeni yataqdaxili sualtı qaz, neft və suvurma boru xətti birləşmələri və əlaqədar sualtı infrastrukturdan, “Şərqi Azəri” platformasından “Azəri Mərkəzi Şərqi” platformasına istiqamətlənən birləşdirilmiş sualtı enerji (ehtiyat) və telekommunikasiya kabelindən ibarət olması planlaşdırılır.

Xatırladaq ki, AÇG yataqlar blokunun birgə işlənməsi və hasil olunan neftin pay şəklində bölüşdürülməsi haqqında (PSA) saziş 1994-cü il sentyabrın 20-də imzalanıb. 2017-ci il sentyabrın 14-də “Azəri”, “Çıraq” yataqları və “Günəşli” yatağının dərinsulu hissəsinin (AÇG) birgə işlənməsi və hasilatın pay bölgüsü haqqında dəyişdirilib və yenidən işlənmiş saziş imzalanıb. Sazişi oktyabrın 31-də Azərbaycan parlamenti ratifikasiya edib. Yeni saziş yatağın 2050-ci ilədək işlənməsini nəzərdə tutur.

Yeni müqavilədə tərəfdaşların pay bölgüsü bu nisbətdədir: BP - 30,37% (operator), AzACG (SOCAR) - 25,00%, "Chevron" - 9,57%, "Inpex" - 9,31%, "Equinor" - 7,27%, "ExxonMobil" - 6,79%, TPAO - 5,73%, "Itochu" - 3,65% və "ONGC Videsh Ltd." (OVL) - 2,31%.