İsmayıllı rayonunda fəaliyyət göstərən tam orta məktəblərin 40 nəfər X-XI sinif şagirdi rayon təhsil şöbəsinin böyük məsləhətçisi Mail Səftərovun və metodiki kabinetin müdiri Şahin Gənciyevin rəhbərliyi ilə Lənkəran, Astara və Masallı rayonlarına “Ölkəmizi tanıyaq”  tur-aksiyası çərçivəsində səfər etmişdilər.
Unikal.org xəbər verir ki, səfər zamanı 9 rayondan gəlmiş tur-aksiya iştirakçıları sırasından 9 komanda yaradılmış və onların arasında intellektual bilik yarışı (Nə? Harada?Nə zaman) keçirilmişdi. İsmayıllı komandası yüksək bilik nümayiş etdirərək,birinci yeri tutmuş və kuboka sahib çıxmışdı. Bu uğurdan az sonra “İctimai TV”-də yayımlanan “Əlaçı” yarışmasında şəhər 3 saylı tam orta məktəbin şagirdi Nicat Xancanlı və 6 saylı  tam orta məktəbin şagirdi  Orxan Pənahov müxtəlif mərhələlərdə  birinci yerə çıxmışlar. Nicat Xancanlı super-finalda da qaliblər sırasında olmuş, üçüncü yeri tutmuşdur.
İsmayıllı təhsil sitemində  ardıcıl olaraq qazanılan bu uğurları həmişə təqdir edən Rayon İcra Hakimiyyətinin başçısı Mirdaməd Sadıqov qaliblərlə görüşüb. Görüşdə təhsil işçiləri, əlaçıların müəllimləri, valideyinləri, məktəb direktorları, ictimaiyyətin nümayəndələri iştirak ediblər.
RİH-nin başçısı təbrik nitqi ilə qaliblərə müraciət edib,müəllimlərin, valideyinlərin əməyini doğrultduğuna görə  onlara təşəkkürünü bildirib,uğurları münasibətilə təbrik edib, ümummilli lider Heydər Əliyevin təhsilə,müəllimə, gəncliyə verdiyi qiymətdən, Prezident İlham Əliyevin Azərbaycan təhsilinin inkişafı və yüksəlişi üçün həyata keçirdiyi səmərəli tədbirlərdən danışıb. Qeyd edib ki, İsmayıllı şagirdləri və müəllimləri dövlət qayğısına yüksək müvəffəqiyyətləri ilə cavab verirlər.
Mirdaməd Sadıqov əlaçı-birinciləri və kubok sahiblərini hədiyyələr və təşəkkürnamələrlə mükafatlandırıb.
Təhsil işçiləri,gənclər təşkilatlarının və ictimaiyyətin nümayəndələri,məktəb direktorları səmimi çıxışları ilə qalibləri təbrik edib, İsmayıllı təhsilinin uğurlarından danışıblar.