Azərbaycan Dövlət Aqrar Universitetində (ADAU) onlayn formatda məzun yarmarkası keçirilib. Tədbiri giriş sözü ilə açan təhsil müəssisəsinin rektoru İbrahim Cəfərov bildirib ki, pandemiyanın sosial-iqtisadi həyatın bütün sahələrinə, o cümlədən təhsil sektoruna təsir etməsinə baxmayaraq universitet məzunlarının müvafiq iş yerləri ilə təmin olunması, onların uğurlu karyerası vacib vəzifələrdən biri kimi daim diqqət mərkəzində saxlanılır.
Unikal.org xəbər verir ki, bununla əlaqədar olaraq sayca 13-cü yarmarkanın onlayn formada keçirilməsi qərara alınıb.
Rektor qeyd edib ki, ökəmizdə aqrar sahənin inkişafına dövlət dəstəyi sayəsində çoxsaylı iş yerlərinin yaranması universitet məzunlarının layiqli məşğulluğu üçün böyük imkanlar yaradır.
Kənd Təsərrüfatı Nazirliyinin Aparat rəhbərinin müavini - İnsan resursları şöbəsinin müdiri Elvin Paşayev nazirliyin fəaliyyət istiqamətlərinə, prioritetlərə uyğun olaraq karyera imkanları barədə tədbir iştirakçılarına ətraflı məlumat verib. Elvin Paşayev əlavə edib ki, bu gün aqrar peşə Azərbaycanda ən nüfuzlu peşələrdən birinə çevrilməkdədir. Aparat rəhbərinin müavini qeyd edib ki, əmək bazarında tələb olunan praktiki bilik və bacarıqlara cavab verən təhsilin inkişafı ölkəmizdə prioritet istiqamətlərdən biridir. O, məşğulluğun təmin olunmasına əsaslanan tədrisin təşkilinin iqtisadiyyatın inkişafı və təhsilin keyfiyyətinə müsbət təsir etdiyini, işəgötürənlər üçün faydalı olduğunu vurğulayıb.
Tədbirdə çıxış edən ölkənin aparıcı kənd təsərrüfatı şirkətlərinin təmsilçiləri yarmarkada təqdim olunan iş yerləri barədə məlumat veriblər, tələbələri öz karyeralarını qurmaq üçün təqdim olunan iş imkanlarından yararlanmağa çağırıblar.
Məzun yarmarkasında iştirak edən 72 müəssisə və təşkilat tərəfindən ümumilikdə 536 vakant yer təqdim olunub. Qeyd edək ki, cari ildə bakalavriat səviyyəsində 1277, magistratura səviyyəsində 157 tələbə olmaqla ümumilikdə 1434 tələbə ADAU-da təhsilini başa vurub.