"Qazaxıstan üçün stabilliyin möhkəmlənməsi kontekstində yeni mərhələdə əsas hədəflərdən biri də xarici sərmayələrin qorunub saxlanmasıdır".

"Unikal" xəbər verir ki, bunu iqtisadçı deputat Vüqar Bayramov deyib. Onun sözlərinə görə, bir sıra digər ölkələrin təcrübəsi göstərir ki, belə iğtişaşlardan sonra birbaşa xarici investisiyaların ölkəni tərk etməsi və yeni bazarlar axtarması hallarına daha çox rast gəlinir.

"Xarici sərmayələrin azalması milli valyutaya təzyiq yaradır və məşğulluğa, o cümlədən insan kapitalının inkişafına neqativ təsir göstərir. Qazaxıstan keçmiş ittifaq dağılandan sonra MDB-də ən çox xarici sərmayə cəlb edən ölkələrdəndir. Belə ki, 1991-ci ildən sonra ölkə iqtisadiyyatına 370 milyard dollar xarici sərmayə yönəlib. 2021-ci ilin ilk yarısında Qazaxıstan xarici birbaşa investisiyaların həcmini 30.4 % artıraraq 11.1 milyard dollar sərmayə cəlb edə bilmişdi. Göründüyü kimi, son iğtişaşlaradək Qazaxıstan xarici sərmayənin cəlb edilməsində xüsusi fərqlənən dövlətlərdən idi. Yeni mərhələdə, yenidən ölkə iqtisadiyyatına inamın tam bərpası vacibdir. Ümid edirik ki, qardaş Qazaxıstan bu vəzifənin öhdəsindən daha qısa zamanda gələ biləcək və yenidən dayanıqlı stabillik mərhələsinə qədəm qoyacaq".

Anar Kəlbiyev