Futbol üzrə Azərbaycan Premyer Liqasında XX tura yekun vurulub.

"Unikal" xəbər verir ki, turun sonuncu oyununda "Zirə" "Qarabağ"ı qəbul edib.

Zirə İdman Kompleksinin stadionundakı qarşılaşma "köhlən atlar"ın 3:0 hesablı qələbəsi ilə yekunlaşıb. Ağdam təmsilçisinin ilk qolunu 10-cu dəqiqədə Ramil Şeydayev vurub.

47-ci dəqiqədə Kadi Borges ikinci dəfə meydan sahiblərini məyus edib. "Zirə"nin qapıçısı Mehdi Cənnətov penaltini dəf etsə də, 26 yaşlı braziliyalı yarımmüdafiəçi qayıdan topu qapıdan keçirib. Borges 64-cü dəqiqədə özünün ikinci, komandasının üçüncü qoluna imza atıb.

Bu nəticədən sonra xallarının sayını 46-a çatdıran "Qarabağ" liderliyini daha da möhkəmləndirib. "Qartallar" isə 35 xalla üçüncü sıradadır.

Qeyd edək ki, günün ilk matçında "Sabah" evdə "Səbail"i minimal hesabla yenib - 1:0. Turun ilk oyun günündə "Keşlə" evdə "Sumqayıt"la 1:1 hesablı heç-heçə edib, "Neftçi" isə "Qəbələ"yə qalib gəlib - 4:0.