Şamaxı şəhərində yerləşən tam orta məktəbdə şagirdin müəllim tərəfindən döyülməsi iddiası ilə bağlı rayon polis şöbəsində araşdırmalara başlanılıb.

Bu barədə "Unikal"a DİN-in mətbuat xidmətinin Şəki regional qrupunun baş inspektoru, polis kapitanı Mahir Məsimov bildirib.

Qeyd olunub ki, xəsarətin dərəcəsinin müəyyən edilməsi məqsədilə məhkəmə-tibbi ekspertiza təyin olunub.

Ekspertizanın rəyindən və aparılan araşdırmanın nəticəsindən asılı olaraq məsələyə hüquqi qiymət veriləcək.

*** 10:24

Şamaxıda müəllim şagirdi döyüb. Hadisədən xəbər tutan valideynlə müəllim arasında dava düşüb.  

"Unikal" REAL TV-yə istinadən xəbər verir ki, hadisə  Şamaxı şəhəri 3 saylı tam orta məktəbində qeydə alınıb. İddiaya görə, 7-ci sinif şagirdi  Rəvan İsayev tarix müəllimi Təranə əsgərova tərəfindən döyülüb. 

Məktəblinin sözlərinə görə, hadisə  dərs saatında baş verib.  Sinif yoldaşı ilə birlikdə sinif otağındakı şkafa girən Rəvan bu səbəbdən tarix müəllimi tərəfindən döyüldüyünü deyir.

Bildirilir ki,  Rəvan İsayev 5 yaşında başından əməliyyat olunub. Bununla yanaşı,  müəllim məktəblini sinif yoldaşlarının yanında təhqir edib. 

Təranə Əsgərova isə deyilənlərin yalan olduğunu və şagirdinə qarşı şiddət göstərmədiyini bildirib.