Son 1 ildə “Azərsu” Açıq Səhmdar Cəmiyyəti abonentlərinin sayı 4,4 faiz artıb. 01 aprel  2023-cü il tarixinə ölkə üzrə 1767898 abonent içməli su təchizatı və tullantı sularının axıdılması xidmətlərinin istifadəçisi kimi qeydiyyata alınıb. Abonentlərin 1697983-ü və ya 96 faizi əhali, 69915-i və ya 4 faizi isə qeyri-əhali qrupu abunəçiləridir. 

"Unikal" xəbər verir ki, abonent sayında artım yeni layihələrin icrası nəticəsində istehlakçıların mərkəzləşdirilmiş içməli və tullantı su şəbəkələrinə qoşulması, yeni tikilmiş fərdi yaşayış evləri sahiblərinin texniki şərt alaraq abonent kimi qeydiyyata düşməsi, həmçinin içməli su və kanalizasiya xidmətlərindən qeyri-qanuni istifadə hallarının aşkarlanaraq qeydiyyata alınması hesabına baş verib. 

01 aprel 2023-cü il tarixinə “Azərsu” ASC abonentlərinin 88,9 faizi sayğacla təmin olunub. Hazırda əhali qrupu abonentləri üzrə sayğaclaşma səviyyəsi 88,7 faiz, qeyri əhali qrupu üzrə isə 95,6 faiz təşkil edir.