HƏMAS oktyabrın 7-də İsrailə hücum zamanı əsir götürdüyü insanları Qəzza zolağının altındakı yeraltı tunellər şəbəkəsində saxlaya bilər.
"Unikal" xəbər verir ki, bu barədə "The Wall Street Journal" (WSJ) məlumat yayıb.
Qeyd olunur ki, HƏMAS silahlıları son illərdə Qəzza metrosu kimi tanınan daha mürəkkəb tunellər şəbəkəsi hazırlayıblar ki, bu da onlara üstünlük verə bilər. Qəzza zolağının altındakı “yeraltı labirint”in ümumi uzunluğu təxminən 800 kilometrdir.
Bundan əlavə, bəzi tunellər yerin 60 metrdən çox dərinliyində yerləşir və yuxarıdan bombardmanlara tab gətirə bilir. Onların bir çoxu işıqlandırma, saxlama yeri, təchizat və silahlarla təchiz olunub ki, bu da Həmas döyüşçülərinə həftələrlə olmasa da, günlərlə yerin altında gizlənməyə imkan verir.
Bundan əvvəl İsrail Müdafiə Qüvvələri (IDF) Həmas girovlarının sayını dəqiqləşdirib. İsrail ordusunun sözçüsü Daniel Hagari bildirib ki, islamçı hərəkat tərəfindən oğurlananların sayı, təsdiqlənmiş məlumata görə, 203 nəfərə çatıb.
Gülayə Mecid
