Bakı Mühəndislik Universitetinin (BMU) sonuncu kurs tələbələrinin istehsalat və pedaqoji təcrübələri davam edir. 

"Unikal" xəbər verir ki, 17 fevral tarixindən başlayan təcrübə prosesində informasiya və kompüter texnologiyaları, iqtisadiyyat və idarəetmə, mühəndislik, pedaqoji fakültələrindən bakalavriat səviyyəsində təhsil alan ümumilikdə 1085 tələbə iştirak edir.

Tələbələr istehsalat təcrübəsini Ekologiya və Təbii Sərvətlər, Əmək və Əhalinin Sosial Müdafiəsi, Kənd Təsərrüfatı,  Rəqəmsal İnkişaf və Nəqliyyat  nazirlikləri, habelə SOCAR-ın müəssisələri, İqtisadi İslahatların Təhlili və Kommunikasiya Mərkəzi, Aqrar Sığorta Fondu, "Azərenerji" və "Azərişıq" ASC-lərin müəssisələri, “Bakı Beynəlxalq Dəniz Ticarəti Limanı” QSC, Abşeron Logistika Mərkəzi, Sumqayıt Texnologiyalar Parkı, "Azertexnolayn", "Aztelekom" MMC-lər, Veysəloğlu Şirkətlər Qrupu, “Azərsun Holdinq” və "Azərsu" ASC-nin müəssisələri, "Bank of Baku", Kapital Bank, Asan Xidmət,  eləcə də digər dövlət və özəl müəssisələrində keçirlər.

Pedaqoji ixtisasların tələbələri isə təcrübələrini XXI Əsr Beynəlxalq Təhsil və İnnovasiya Mərkəzi, Landau məktəbi, Zirvə, İdrak, İstanbul və Hədəf liseylərində davam etdirirlər.

Təcrübə prosesi hər bir sahənin peşəkar mütəxəssisinin nəzarəti və fənn müəllimlərinin dəstəyi ilə həyata keçirilir. Tələbələr təcrübə zamanı tədrisdə yiyələndikləri nəzəri biliklərini möhkəmləndirir, gələcək peşə fəaliyyətləri üçün zəruri bacarıq və vərdişlər qazanırlar. 

Bakalavriat səviyyəsində təhsil alanların təcrübəsi iyulun 5-də başa çatacaq.

Habelə müxtəlif ixtisaslar üzrə magistratura səviyyəsində təhsil alan 155 tələbə üçün təşkil olunmuş elmi-tədqiqat, həmçinin elmi-pedaqoji təcrübə proqramı davam edir və aprelin 22-də yekunlaşdırılması nəzərdə tutulur.