Diaqnoz Tibb Mərkəzinin Kardioloqu, Azərbaycan və Avropa kardiologiya cəmiyyətlərinin üzvü Dr. Ağadadaş Rəşidov yaz aylarında ürək və hipertoniya xəstələrinə xəbərdarlıq edib.

"Unikal" xəbər verir ki, hava şəraitinin dəyişməsi ilə əlaqədar yüksək təzyiq və ürək xəstəliklərinin kəskinləşməsi ilə xəstəxanalara müraciət edənlərin sayı artıb. Ürək problemləri adətən yaz və payız aylarında pisləşir. Uzunmüddətli yüksək təzyiqdən əziyyət çəkənlər beyin, böyrək, ürək və damar kimi bir çox xəstəliyə səbəb olur.

Hipertoniya xəstələrində ölüm halı digər orqanlarda yaranan fəsadlar üzündən baş verir.

Nə etməli?

Kardioloq DR. Ağadadaş Rəşidov tövsiyə edir:

-duz qəbulunu məhdudlaşdırın
-gündə iki dəfə qan təzyiqini ölçün
-zəruri hallarda və yalnız bir həkim tövsiyəsi ilə dərmanların dozasını dəyişdirin.

Qan təzyiqi mütəmadi olaraq ölçülməlidir, çünki bəzən yüksək təzyiqlə xəstə özünü yaxşı hiss edir və təzyiqin artdığını dərk etmir.
Belə ki, yaz aylarında tez-tez dərmanların dozasının dəyişdirilməsinə ehtiyac yaranır, lakin buna yalnız həkimlə məsləhətləşdikdən sonra qərar vermək olar, xəstələr öz-özünə dərmanlamamalıdırlar.

Hipertoniya getdikcə cavanlaşır…

Həkimin sözlərinə görə, bütün dünyada olduğu kimi, Azərbaycanda da xəstəliklərin cavanlaşması tendensiyası müşahidə olunur. Yüksək qan təzyiqi gənclər arasında daha çox rast gəlinir.

Həkim xəstəxanaya müraciətlərin sayının artmasının əhalinin maarifləndirilməsi ilə bağlı olduğunu da istisna etmir: “İlk əlamətlər aşkar edildikdə onların bizimlə əlaqə saxlaması təqdirəlayiq haldır ki, bu da xəstəliyin mümkün fəsadlarının qarşısını almağa imkan verir”.