Qaqauziyanın rəhbəri Yevgeniya Qutsul Moldova hakimiyyətini siyasi təqibdə ittiham edərək bildirib ki, onun həbsi və ona qarşı irəli sürülən ittihamlar onu tutduğu vəzifədən uzaqlaşdırmaq məqsədi daşıyır.

"Unikal" xəbər verir ki, bu barədə Qutsul vəkilləri vasitəsilə yaydığı bəyanatda bildirib. 

O, təqsirinin sübuta yetirilmədiyini vurğulayaraq, cinayət təqibini onu nüfuzdan salmaq və vəzifədən uzaqlaşdırmaq cəhdi adlandırıb.

“Bu gün əsl məqsədi ədalət deyil, məni Qaqauziya xalqının mənə bəxş etdiyi mandatı yerinə yetirməkdən uzaqlaşdırmaq olan iş üzrə növbəti məhkəmə iclası keçirildi”, - deyə məlumatda bildirilir.

Qutsul həbsi “Qaqauziyanın səsini” boğmaq və qaqauz xalqını kimlik hüququndan məhrum etmək cəhdi kimi qiymətləndirib. O, onu dəstəkləyən və siyasi təzyiqlərə qarşı çıxan muxtariyyət sakinlərinə minnətdarlığını bildirib.