Dağıstanın Xasavyurt rayonunun Sulevkent kəndində yanacaqdoldurma məntəqəsində güclü partlayış baş verib.

"Unikal" xəbər verir ki, partlayış o qədər güclü olub ki, bir neçə kilometr uzaqlıqdan görünüb.

İlkin məlumata görə, dörd nəfər müxtəlif dərəcəli (I-III dərəcə) yanıq xəsarətləri alıb və xəstəxanaya yerləşdirilib.

SHOT teleqram kanalının məlumatına görə, hadisə qazın köçürülməsi zamanı tutumun hermetikliyi pozulduqda baş verib. Partlayışdan sonra yaxınlıqdakı ot tayası və qəbiristanlıqda da yanğın başlayıb.

Faktla bağlı Dağıstan Prokurorluğu araşdırmaya başlayıb. Hadisənin səbəbləri və şəraiti dəqiqləşdirilir.