Hüseynqulu Bağırov yeni səlahiyyətlər əldə edə bilər
Hüseynqulu Bağırov yeni
səlahiyyətlər əldə edə bilər
Bu isə bəzi başqa məmurları yəqin ki, qısqandıracaq

Azərbaycanda bir nazirin səlahiyyətləri artırıla bilər. Bu, ekologiya və təbii sərvətlər naziri Hüseynqulu Bağırovdur.
Məsələ burasındadır ki, Azərbaycanda yaşıllıqların mühafizəsinin gücləndirilməsi məqsədilə yeni qanun qəbul ediləcək. Dünən parlamentin Aqrar siyasət komitəsinin iclasında "Yaşıllıqların mühafizə haqqında" qanun layihəsi müzakirə edilib. Komitənin sədri Eldar İbrahimov bildirib ki, bu qanunun qəbul edilməsində başlıca məqsəd yaşıllıqları qorumaq və onların sahəsini artırmaqdır.
Qanun layihəsinin mühüm əhəmiyyət daşıdığını qeyd edən ekologiya və təbii sərvətlər nazirinin müavini Firdovsi Əliyev bildirib ki, son 10 ildə Azərbaycanda yaşıllıq ərazilər 11,4%-dən 11,8%-dək artırılıb. Bu artım 0,4% təşkil etsə də, Azərbaycan kimi yaşllığı az olan ölkə üçün çox əhəmiyyətli göstəricidir.
Onun sözlərinə görə, yaşıllıqların 10,3%-i mühafizə edilir ki, bu ərazilərdə də 9 milli park fəaliyyət göstərir. Ən böyük milli park Şahdağ Milli Parkıdır ki, bu da 130 min kv.m ərazini əhatə etməklə Cənubi Qafqazda ən böyük parkdır.
İclasda qeyd edilib ki, bu qanun Azərbaycan Respublikasında insanların sağlam ətraf mühitdə yaşamaq hüququnu təmin etmək məqsədilə meşə fonduna daxil olmayan yaşıllıqların (ağac-kol bitkilərinin) qeydiyyatı, mühafizəsi, salınması, bərpası və artırılması ilə əlaqədar münasibətləri tənzimləyəcək.
Yeni qanuna əsasən, yaşıllıqların zədələnməsi və ya məhv edilməsində, o cümlədən müvafiq icra hakimiyyəti orqanının verdiyi icazə olmadan ağac-kol bitkilərinin kəsilməsində, budanmasında və yaşıllıqların götürülməsində, yaşıllıq sahəsinin müxtəlif növ tullantılarla zibillənməsi və korlanmasında təqsirkar şəxslər qanunverciliklə müəyyən edilmiş qaydada məsuliyyət daşıyacaqlar. Hətta vurulmuş ziyanın ödənilməsi də yaşıllıqların zədələnməsi və ya məhv edilməsində təqsirli olan şəxsləri maddi, intizam, inzibati, və cinayət məsuliyyətindən azad etməyəcək.
"Yaşıllıqların mühafizə haqqında" qanun layihəsində qeyd edilir ki, yaşayış məntəqələrində tikinti işlərinin başlanması ilə əlaqədar müvafiq qaydada uyğun icazə olmadan yaşıllıqların yerinin dəyişdirilməsi qadağandır. Eləcə də şəhərlərdə və ya digər yaşayış məntəqələrində yerləşən yaşıllıq sahələrində tikinti işləri aparılarkən, magistral avtomobil yollarının və dəmir yolunun mühafizə zolaqlarında yerləşən yaşıllıq sahələrində, su obyektlərinin və su təsərrüfatı obyektlərinin (su anbarları da daxil olmaqla) mühafizə zolağında yerləşən yaşıllıq sahələrində bu qanunda nəzərdə tutulan qaydada icazə olmadan ağac və ya kolların zədələnməsi, kəsilməsi və ya məhv edilməsinə icazə verilmir. Bundan əlavə, müvafiq icra hakimiyyəti orqanı tərəfindən tərtib edilmiş yaşıllıq ərazilərinin katasdrında olan ağac və ya kol əkinlərinin zədələnməsi və ya məhv edilməsi, habelə qanunvericilikdə nəzərdə tutulmuş qaydada lazımi icazə olmadan kəsilməsinə görə də məsuliyyət nəzərdə tutulur.
Qanun layihəsinin müzakirəsində iştirak edən bir sıra digər nazirlik və təşkilatların nümayəndələri də müəyyən təkliflərini irəli sürüblər. Həmçinin təklif edilib ki, ümumiyyətlə, yaşıllıq olan ərazilərdə dövlət əhəmiyyətli obyektlər daxil olmaqla heç bir tikinti aparılmasın.
Millət vəkilləri deyilən təklifləri də nəzərə alaraq qanun layihəsinin Milli Məclisin plenar iclasının müzakirəsinə çıxarılmasına razılıq veriblər. Qeyd edək ki, qanun layihəsi Ekologiya və Təbii Sərvətlər Nazirliyi tərəfindən hazırlanaraq Milli Məclisə təqdim edilib.
Bəzi ekspertlər qanun layihəsi qəbul olunarsa, bunu Ekologiya və Təbii Sərvətlər Nazirliyinin səlahiyyətlərinin genişləndirilməsi kimi qəbul edirlər. Yuxarıdakı məqamlardan da bu, aydın görünür. Belə bir səlahiyyət genişlənməsi əslində təbii qəbul olunur. Çünki indiyədək yaşıllıqların mühafizəsində ortaya çıxan problemlər müəyyən məqamlarda hazırki qanunvericiliyin Hüseynqulu Bağırovun nazirliyinin əl-qolunu bağlaması ilə izah edilirdi.
Qeyd etmək yerinə düşər ki, bəzi nazirlər son prezident seçkilərindən sonra həm səlahiyyətlərinin genişləndirilməsi, həm də özlərinə yaxın kadrların önə çəkilməsi baxımından müəyyən gözlənti içində idilər. Amma belə gözləntilər doğrulmadı; hətta onlardan bəziləri səlahiyyətlərinin bir hissəsini də itirdilər. Bu mənada indi onların ekologiya və təbii sərvətlər nazirinin səlahiyyətlərinin artırılmasını qısqanclıqla qarşılayacaqlarını təxmin etmək çətin deyil.
Azər Vəliyev