Səfər Əbiyevin qudası haqqında yeni iddia
Səfər Əbiyevin qudası haqqında yeni iddia

Kənd təsərrüfatı nazirinin sabiq müavini stadionu satmaq istəyir?

Kənd təsərrüfatı nazirinin keçmiş müavini Aslan Aslanov yaxın qohumunun adına özəlləşdirdiyi Şəmkir şəhər stadionunu satmaq istəyir. Stadiona isə 2 milyon manat qiymət qoyulub.
Bu barədə Şəmkirdəki mənbələrdən məlumat daxil olub (axar.az). Qaynağın sözlərinə görə, stadionun tikintisində Şəmkirdə Saşa kimi tanınan mərhum iş adamı Şahbaz Süleymanovun da xidmətləri olub. Stadionun tikintisinə vəsaitin bir hissəsini də o vaxt məhz Saşa ayırıbmış.
Stadionun ərazisi Şəmkir rayonunun "Klara Setkin" sovxozunun balansında olub. Amma rayonda aqrar islahatlar aparılarkən bu ərazi sovxozun fəhlələrinə torpaq payı kimi paylanmayıb. Ərazini o vaxt Şəmkirdə icra başçısı vəzifəsini tutan Aslan Aslanov özəlləşdirib.
Stadion əvvəlcə keçmiş Dəllər Tikinti Materialları Kombinatının direktoru Fəxrəddin Rzayevin adına Azərbaycan Respublikası Ədliyyə Nazirliyi Hüquqi Şəxslərin Dövlət Qeydiyyatı üzrə Şəmkir bölgə şöbəsində qeydiyyata alınıb. Amma az sonra A.Aslanov stadionu öz yaxın qohumu olan Zəyəm-Cırdaxan kəndində yaşayan Dilqəm İsmayılovun adına rəsmiləşdirib.
Qeyd olunur ki, hələlik stadionu almaq istəyən yoxdur. Yalnız Moskvada yaşayan əslən şəmkirli Məhərrəm adlı iş adamı buna cəhd edib. O, 2 milyon manat verərək stadionun ərazisini almaq istəyib. Amma ondan stadion kimi yox, sökdürüb torpaq sahəsi kimi istifadə etmək üçün. Amma Aslanov regionun ən böyük idman obyektlərindən olan Şəmkir şəhər stadionunun bu şərtlə satılmasına yuxarıların qəzəbindən ehtiyat etdiyi üçün razı olmayıb.
Aslan Aslanov isə Şəmkir şəhər stadionunu satması ilə bağlı haqqında yayılan xəbərə münasibət bildirərkən belə deyib: "Yayılan məlumatlar yalandır. Stadionun mənə heç bir aidiyyəti yoxdur. Bundan artıq bir söz deyə bilməyəcəm".
Azər Vəliyev