Azərbaycan prezidenti İlham Əliyev metallurgiya kompleksində sağlamlaşdırma və restrukturizasiya tədbirlərinin həyata keçirilməsi haqqında sərəncam imzalayıb.
Unikal.org-un məlumatına görə, Azərbaycan Polad İstehsalı Kompleksinin daxilində olan "Daşkəsən Filizsaflaşdırma Açıq Səhmdar Cəmiyyəti özəlləşdirməyə açıq elan edili və bu məqsədlə Əmlak Məsələləri Dövlət Komitəsinin sərəncamına verilib.
Əmlak Məsələləri Dövlət Komitəsinə tapşırılıb ki, "Daşkəsən Filizsaflaşdırma ASC-nin dövlətə məxsus səhmlərinin investisiya müsabiqəsi vasitəsilə satışı üsulu ilə özəlləşdirilməsini təmin etsin, investisiya müsabiqəsinin dövlətin strateji maraqlarına uyğun şərtlərlə və daha səmərəli keçirilməsi məqsədi ilə nüfuzlu məsləhətçi şirkətin cəlb edilməsi ilə əlaqədar zəruri tədbirlər görsün.
Müəyyən edilib ki, sərəncamda göstərilən səhmlərin özəlləşdirilməsində yerli investorlarla yanaşı xarici investorların da iştirakına icazə verilir.
Nazirlər Kabinetinə tapşırılıb ki, Əmlak Məsələləri Dövlət Komitəsi və "Azərbaycan Polad İstehsalı Kompleksi Qapalı Səhmdar Cəmiyyəti ilə birlikdə "Daşkəsən Filizsaflaşdırma ASC-nin balansında olan əmlakla Əmlak Məsələləri Dövlət Komitəsinin sərəncamına verilməsini və bununla bağlı təhvil-təslim işlərinin bir ay müddətində başa çatdırılmasını təmin etsin.
