Xəbər verdiyimiz kimi, bu gün Azərbaycanda 4 bank bağlanıb.

Unikal.org-un "Qafqazinfo-ya istinadən məlumatına görə, iqtisadçı ekspert Vüqar Bayramov bu məsələyə münasibət bildirib. O, qeyd edib ki, banklar barəsində görülən tədbirlər davam etdiriləcək:

"Maliyyə Bazarlarına Nəzarət Palatasının (Palata) Direktorlar Şurasının 21 iyul 2016-cı il tarixli qərarına əsasən "Dekabank ASC, "Kredobank ASC, "Parabank ASC və "Zaminbank ASC-nin bank lisenziyaları ləğv edilib. Təbii ki, bu qərar gözlənilən idi. Hələ ötən ilin sonunda bankların sayının azalacağını bildirmişdim. Amma təbii ki, bunlar da bağlanan sonuncu banklar olmayacaqlar. Neft bumu dövründə yüksək faizlərlə böyük gəlirlər qazanan "ərköyün banklar post-neft dövrünə hazır ola bilmədilər. Təəssüf ki, öz funksiyalarını tam yerinə yetirməyən amma lisenziyası geri alınmayan bankların sayı heç də az deyil. Hal-hazırda əmanətçilərin öz halal pullarını qaytara bilmədikləri banklar var, amma təəssüf ki, palata onların lisenziyasının ləğv edilməsi barədə qərar qəbul etmir. Nəticədə, sığorta hadisəsi baş vermədiyindən əmanətçilər öz depozitlərini geri götürə bilmirlər. Əslində, belə bankların da lisenziyasının geri alınmasına və əmanətlərin tam şəkildə fond tərəfindən ödənilməsi təmin edilməlidir.

Vüqar Bayramov sözügedən banklardan əmanətlərin geri götürülməsindən də danışıb:

"Dörd bankın hamısı Əmanətlərin Sığortlanması Fondunun üzvləri olduğundan onların müflis elan edilməsi artıq sığorta hadisəsinin baş verməsi deməkdir. Əmanətçilər öz sığortalanan pullarını fonddan geri almalıdırlar. Bu zaman artıq əmanətlərin hissə-hissə deyil, tam şəkildə qaytarılması həyata keçirilməlidir. Gözlənilir ki, palata bu banklara müvəqqəti inzibatçı təyin ediləcək. Əmanətçilər bundan sonra öz pullarını geri ala bilməlidirlər. Əmanətlərin Sığortlanması Fondu tərəfindən sığortalanan hər bir depozitin son qəpiyinədək əmanətçiyə qaytarılması olduqca vacibdir. Qeyd edim ki, mövcud qanunvericilikdə məbləğindən asılı olmayaraq bütün depozitlər sığortalanır. Sadəcə, maksiumum divident faizi dollar əmanətləri üzrə 3, manat əmanətlərində isə 12 faizdən çox olmamalıdır.